Sri Lanka Muslim Pawl Lehrulcham an Tong Thluahmah| Video

| The Chin Journal | Hakha, Chin State

Sri Lanka ram ah Khrihfa biakinn pathum le Hotel pathum Muslim ralhrang nih bomb an puah hnu ah Sri Lanka ah a ummi Muslim pawl nih harnak an hun tong thluahmah ve.

Sir Lanka ram khualipi Colombo khuachung ah a ummi Muslim dawr tampi hrawhpiak le mei in khanghpiak an tong hna.

Nizan May 14 zong ah khan Minuwangoda khua ah a ummi Mulim biakinn cu mibu nih an luh hnawh Muslim pakhat an thah pin ah biakinn chung thilri vailte an hrawh dih.

Aluancia April 21, Thawhthan Zing ah khan Sri Lanka ram Colombo khuachung i Khrihfa biakinn pathum le Hotel pathum cu ralhrang nih bomb an rak puah i minung 258 an nunnak a rak liam.

ISIS ralhrang nih kanmah tuahmi bomb puahnak a si tiah thawngthanhnak an tuah. Vawleicung ralhrang bomb puah thahnawnnak vialte lak ah Sri Lanka bomb puahnak hi tihnung bik pakhat le minung tam bik an thihnak a si. Ralhrang bomb puahnak a chuah hnu ah minung 150 leng an tlaih hna.

Ralhrang bomb puahnak chuah hnu ah Buddhist ram a simi Sri Lanka mipi nih Muslim mipi cung ah lehrulchamnak faak ngaiin an tuah ve.

Muslim ngeihmi dawr, inn le biakinn pawl hrawh le meikhanghpiak an tong thluahmah. Muslim innchungkhar tampi cu innleng ah chuak ngam loin innchung ah an i erh hna, tiah AFP nih a tial.

-AFP

Latest News