Singapore Muslim Biakinn ah Ralhrang Thahnawnak Tuah a Timtu Khrihfa Tlangvalno an Tlaih

| The Chin Journal | Hakha, Chin State

Singapore ramchung i Muslim pawl an i pumhnak biakinn pahnih ah ralhrang thahnawnnak tuah ding in timhtuahnak a ngeimi kum 16 Khrihfa tlangval no cu Singapore Internal Security Department (ISD) nih nihin ah an tlaih, tiah theih a si.

Hi kum 16 Khrihfa tlangval no hi India hrin a si i, Singapore ah sianginn a kai liomi zong a si.

ISD nih, “Namte hmang in Muslim pawl thah ding in ttha tein timhtuahnak a ngei dih. Thahnawnnak tuah a timhnak Muslim biakinn pahnih hi a umnak inn he aa naihmi an si hna,” tiah thawngfianhnak ah an langhter.

Ahlanken tein timhtuahnak ttha tein aa ngeih dih i aralaimi March 15 ah khin thahnawnnak tuah ding in aa timhtuah hi a si.

Aluancia March 15, 2019 ah khan New Zealand ram Christchurch khua i muslim biakinn pahnih ah Khrihfa a simi Brenton Harrison Tarrant (kum 28) nih thlacamnak a tuah liomi Muslim pawl meithal in a rak kah hna i, minung 51 an nunnak a rak liam.

Atu Singapore i tlangval no pa zong nih March 15 thengmang ah thahnawnnak tuah ding in aa thim caah New Zealand Christchurch khua Muslim thahnawnnak kum 2 tlin camtuak phun in thahnawnnak tuah a timh ve hi a si lai, tiah ISD nih an zumh.

Thahnawnnak tuah ding in aa selnak Muslim biakmi pahnih cu Sembawang ah a ummi Assyafaah Mosque le Woodlands ah a ummi Yusof Ishak Mosque hi an si.

Thahnawnnak tuah a timhnak Muslim Biakinn pahnih

Zeitindah aa Timhtuah?

Hi tlangval no nih hin Muslim biakinn pahnih ah thahnawnnak tuah a timh caah biakinn pakhat ah thahnawnnak a tuah dih in a dang biakinn pakhat ah khulrang in a kal khawh nakhnga motor a fimnak hmun tiang in dikthlir tein a timhtuah.

Cun, online ah ralkap ttaangkham (Tactical Vest) aa cawk i, thahnawnnak a tuah lio online ah Live thlah kho ding in cu ttaangkham ah cun phone zong ttha tein a tarh.

Muslim pawl thahnawnnak ca ah ahmasa ahcun meithal (Rifle) hman ding in a timhtuah. Asinain, aa let tthan i namte tu hman ding in aa tim. $190 man namte pakhat online ah cawk ding in timhtuahnak a ngei.

Cu lawng si loin thahnawnnak a tuah hlan ah zapi hmuh in langhter dingmi ca phun hnih zong a ttial cia.

Pakhat cu French rammi ca ah a ttialmi a si. French rammi pawl nih Muslim pawl ralchanh in an doh hna nakhnga forhfialnak ca a ttial.

Cun, a pahnihnak ca chung ah cun zei ruang ah dah thahnawnnak a tuah timi kong le Muslim pawl cung ah huatnak a ngeihnak kong a langhter, tiah ISD nih an chim.

Palik nih bia an hal lio ah a chimmi cu: “Hi thahnawnnak tuah ding in timhtuahnak ka ngieh lio ah hin a phichuak pahnih cu a um hrim lai tiah ka ruahciami a si ko. A pakhatnak cu thahnawnnak ka tuah manh hlan ah palik nih an ka tlaih lai. A pahnihnak cu thahnawnnak ka tuah dih ah palik nih meithal in an ka kah lai ti hi an si,” tiah palik sin ah a chim.

Zei Ruang ah Muslim Cung Huatnak Fak a Ngeih?

Kum 16 lawng a si rihmi Khrihfa mino nih ralhrang thahnawnnak tiang in tuah awk ah zei ruang ah dah lungput a ngeih i, atu bantuk in timhtuahnak zong ttha tein aa ngeih timi hi zapi nih an ruah ciomi a si.

Palik nih online a cawlcanghnak an zohfel tik ah hi kum 16 Khrihfa mino nih hin New Zealand ram i Christchurch thahnawnnak Live in a rak zohmi an hmuh pin ah ISIS ralhrang nih Khrihfa pawl an thahmi hna video pawl le ISIS nih Muslim a si lomi pawl thah ding in an forhfial hnanak video pawl zong a rak zoh hna.

“Muslim biakinn pahnih ah March 15 thengmang ah thahnawnnak tuah ding in aa timhtuahnak aruang bik cu New Zealand Christchurch khua Muslim thahnawnnak nih a lung a lak bik caah a si ko,” tiah ISD nih an langhter.

Atu bantuk in Muslim pawl namte in thah ding in timhtuahnak a ngeihmi hi a chungkhar, a hawikom le innpa zong nih an rak thei lo tiah ISD nih an langhter chap.

Cun, hi tlangval no hi Muslim a dohdaltu bu dangdang he pehtlia in a cawlcaangmi zong a si lo i, amah pumpak pakhat lawng nih Muslim biakinn pahnih ah ralhrang thahnawnnak tuah a timh hi a si, Singapore ram thawngzamhnak pawl nih an langhter.

Cherhchan: The Straits Times

Latest News

News in Burmese