Singapore Inntek Fanute a Vua Lengmangtu Myanmar Sinum Thong an Thlak| Video

| The Chin Journal | Hakha, Chin State

Singapore ram ah sinum rian a tuan i inntek hna i kum 5 an fanute a lu ah hmunphiah, TV Remote Controller, Darkeu tibantuk in a vua zungzaltu Myanmar sinum nu cu October 1 ah Singapore biaceih zung nih kum 1 le thla 2 thongthlak ding in dan a tat, tiah theih a si.

Thongthlak a tongmi Myanmar sinum hi kum 27 minung a si i, a min bel langhter a si lo. Singapore ram i Vietnam hna nuva nih an fale zohkhenh ding in an hlanmi a si.

Aluancia April 2018 thawk khan Myanmar nu nih cun a umnak i an fanu cu humphiah, handphone, darkeu tibantuk in a lu le a hnawng tibantuk ah caan saupi a cumh chih tawn.

Biaceih zung nih record a chiah ning ah darkeu in voi 34 bak hi April thla chung ah Myanmar sinum nu nih ngakchia nute hi a lu ah a tuk tiah a langhter.

Ngakchia nu i a u deuh zong ca a chimh pah lio ah khedan in a tlawm bik 11 hi a lu ah a tuk pin ah cabuai ah a lut a suk chih.

Atu bantuk in Myanmar sinum nu nih ngakchia pawl a tuahtomi hna kong he pehtlai in ngakchia hna i hringtu nu (kum 36) nih December 24, 2018 ah khan palik sin ah report a tuah. (A tang video hi Myanmar sinum ngakchia nute a vuak lio a si)

https://youtu.be/7Eu8_yLs9xg

“Myanmar rammi ka sinum nih ka fale a vuak zungzal hna. Voi tampi a vuakmi hna CCTV in ka hmuh,” tiah ngakchia hna i hringtu nu nih cun a chim.

Biaceih zung ah Myanmar sinum nih, “Ka thiltuahmi cung ah kaa ngaichih hringhran. Ngakchia pahnih ka zohkhenh hna i pakhat deuh i a thluak tlamtling tuk lomi a si. Cu pin ah innrian vialte ka tuan dih fawn. Cucaah, lungthin le taksa lei in ka zaang a ba tuk tawn i a si,” tiah a chim.

“Ngakchia pawl hi dinte lawng in ka vuak ko hna. Thazaang telh in ka vua hna lo. Ka vuak hnanak ah an taksa ah hliamhma le thisen zong a um lo,” tiah Myanmar sinum nih cun a chim chap.

Singapore biaceihbawi Lee Wei Liang nih “Pumpak thinhun ruang ah mah bantuk puarhrannak tuah cu cohlan awk a tha lo. Abikin, atu bantuk in ngakchia cung ah ruruhranghrang in tuahto le tukvelh hi ngaihthiam awk a tha lomi sualnak a si,” tiah a ti i, Myanmar sinum cu kum 1 le thla 2 thongthlak ding in dan a tat, tiah theih a si.

-Today

Latest News