Siangngakchia Nu a Tuk Ruang ah Nulepa Nih Vuakmi Sayapa Mi Tampi Nih an Dirpi

| The Chin Journal | Hakha, Chin State

Atulio Myanmar ram ah a hun lar taktakmi Mandalay khua i “Suh Private School” thilcang kong he pehtlai in siangngakchia nu nulepa nih an vuakmi Math/သခၤ်ာ sayapa nih September 26 ah thil sining fianternak a tuah ve.

September 12 zinglei ah Suh Private School ah Math cachimtu saya U Nyi Nyi Htwe nih kum 16 a simi siangngakchia nu cu chimhrinnak ah fung in a tuk.

Hi thil a can lio ah hin khaanchung ah siangngakchia 40-50 hrawnghrang an um ve pin ah CCTV zong a um. Asinain, CCTV a fian tuk lo caah thil sining fiang in a lang lo.

Tuk a tongmi siangngakchia nu nih sayapa nih a tuknak kong cu a nulepa a chimh hna.

Saya Nyi Nyi Htwe nih kan fanu ningcang loin a tonghtham tiah sual a puhtu nulepa. Annih hi Mandalay khua ah Hotel zong a ngeimi mirum ngai an si.

September 15 ah siangngakchia nu nulepa nih Saya Nyi Nyi Htwe cu sayagyi zung khaan an ton i hmurkaa in chimphoih si loin sayapa cu an nupa in an vuak.

Cuti sayapa an vuak lio CCTV video cu September 22 ah online ah a kai ciammam i mi tampi nih siangngakchia nu i a nulepa cung ah sual an phawt hna.

Siangngakchia nulepa nih sayapa an vuaknak ah a lut a kuai i a kehlei mit zong a duk viar.

An vuak lio video online ah a kai hnu September 23 ah siangngakchia nu nulepa nih Media sin ah thil sining fianternak an tuah.

Nihin thil sining fianternak hmun ah siangnakchia tampi le siangngakchia pawl i nulepa nih saya Nyi Nyi Htwe thazaang pek in an rak chuahpi| Mizzima

Cu ah cun, “Saya Nyi Nyi Htwe nih kan fanu hi chimhrin sawh si loin kan fanu ahnulei hngawng hna a tongh. Cun, a hnuk ah purhdah a timh,” tiah nulepa nih cun Media pawl sin ah an chim.

Sihmanhsehlaw, khaanchung ah a um vemi siangngakchia tampi nih “Kan sayapa hi mah bantuk minung a si lo. Caan saupi ca a kan chim cangmi a si i, minchiatnak a ngei ballomi a si. Lih in an puhmi a si,” tiah an ti i saya Nyi Nyi Htwe cu an dirkamh.

Nihin September 26 ah saya Nyi Nyi Htwe nih Media sin ah thil sining fianternak a tuah ve i ca a chimhmi Suh Private School siangngakchia tampi nih an run chuahpi i thazaang an pek, an dirkamh.

Online zong ah Myanmar rammi tampi nih saya Nyi Nyi Htwe an dirkamhnak an langhter cio.

Hi kong he pehtlai hin siangngakchia nute i a nulepa lei nih tazacuainak an tuah bang in saya Nyi Nyi Htwe te lei zong nih tazacuainak an tuah ve.

Latest News