Sianginn Kai a Duh Lomi an Fapa Nulepa nih Lamkam Hnawm Char in Tangka an Kawlter

| The Chin Journal | Hakha, Chin State

Thailand nuva hna i an fapa kum 5 ngakchia cu sianginn kai lai paoh ah a zia a hun chuak theo tawn. Cucaah nulepa an lung a rawk ngaingai. A hnu ah cun Idea pakhat an chuah.

Hringtu a nu Nutanitcha Chotsirimeteekul le a vapa nih cun sianginn kai a duh lomi an fapa cu chimhhrinhnak caah hnawm na char lai tiah an ti.

“Hnawm na char lai i na zuar hnu ah na hmuhmi tangka in na duhmi naa cawk lai” tiah a nu le a pa nih cun an ti.

Ngakchia pate cu lamkam hnawm char ah aa hun thawh. Cun, a nulepa zong nih an zulh ve. 2.2 Kilometers chung harsa ngai in thilchia pawl a khawm. A rih/zaan 2 kg hrawng a char khawh. A thilri charmi cu a zuar i Baht fang 2 (US $ 0.63) a hmu.

Nutanitcha nih a fapa cu “Bus cit man Baht fang 10 a si, na ngeihmi fang 2 lawng a si” a ti i kee in an tin hna. Lampi ah a fapa nih tikhal changreu ka duh tiah a hauh hna. A nu nih cun “Baht fang 5 a si, na ngeihmi fang 2 lawng a si, zeitindah na cawk khawh lai” a ti i cuticun inn an tin hna.

Cu ni thok cun an fapa cu sianginn kai lai paoh ah a zai a tam ti lo tiah Nutanitcha nih a chim. Ngakchia pa an chimhhrin ning konglam cu hringtu a nu nih online ah a langhter.

Micheu nih a phunphun in sual an phawt hna nain that lei in a hmutu zong an rak um ve.

-Rachfeed

Latest News