Sianghleirun Siangngakchia Pa nih Kum 6 Ngakchia Nu Nam in a Sawh

| The Chin Journal | Hakha, Chin State

Sagaing ramthen, Mongywa peng, Ma-U Gyi khuate ah sianghleirun kum 2nk a kai liomi pa nih lente aa celh liomi kum 6 ngakchia nu namte in a sawh caah a nunnak a liam, tiah theih a si.

Nihin zinglei sml. 9:00 hrawng ah Ma-U Gyi khuate i Buddhist pura tual thudan cung ah Okka Min (kum 19) timi pa cu ca a zoh.

Ca a zoh lio ah a pawng ah nu ngakchia pathum lente an i celh ve. Okka Min nih cun zei bia hmanh chim loin namte aa chuah i lente aa celhmi nu ngakchia pathum lak ah kum 6 ngakchia nute cu nam in a sawh.

Namsawh a tongmi ngakchia nute hi Eh Thet Say tiah an auhmi a si i, sizung ah an phakpi nain a hngawng ah nam in voi 2 sawh a ton caah cu hliamhma cun a nunnak a liam thai.

Nam in a sawhtu Okka Min cu palik nih bia an hal tikah, “Zeiti ka tuah timi kaa thei lo. Nam in ka sawh hnu ceo ah ka lung a fim,” tiah a chim.

Okka Min cu Mongywa palik sakhaan ah an hren i lainawn sualtuahnak pohma 302 in case an on, tiah theih a si.

Latest News