Saya/ma Training a Kai Ding Laihlum Tam Deuh Kan Lakpiak U Tiah MP Ni Sui Lian Nih Hal

| The Chin Journal | Hakha, Chin State

Primary sianginn cachimtu ding in Training (PPTT) a kai kho dingmi pawl lak tik ah Kawlram chung hmundang in a rak rami nakin Chinram chung khuasa tam deuh in rak kan lakpiak u, tiah MP Ni Sui Lian nih Pyituh Hluttaw ah halnak a tuah.

September 13 ah tuahmi Pyituh Hluttaw meeting ah MP Ni Sui Lian nih, “PPTT cawnnak ah a lut kho dingmi minung thim tik ah Chinram chung khuasa pawl hi upavo kan pe u law, a hleimi hmunhma tu kha a dang ramkulh le ramthen i minung pawl pe hna u,” tiah halnak a tuah.

“Chinram chung tanghra sungh-awn a chiatnak zong hi saya/ma kan i phakzo lo caah a si. Hmundang in a rak phanmi sayate cu chikhat lawng an um i, an rank a hun kai cun anmahle ramkulh le ramthen ah an i thial than hna. Cun, thil sining dangdang kong ruang ah sayate aa thialmi an um tawn i a lawngmi cachimtu rian hmunhma ah khulrang in sayate dang kan chia kho hna lo…kanmah Chinram chung khuasami tu hi upavo pek in thim an si ahcun Chinram chung ah saya/ma herhbaunak a zor deuh lai,” taih a langhter.

2019-2020 cacawn kum ah PPTT training kai ding in minung 1150 nih Hakha Education College ah an sok i minung 180 nih an hmu.

Cu 180 chung ah cun 56 (30%) lawng hi Chinram chung ah khua a sami an si i 132 (70%) cu a dang ramkulh le ramthen in an si hna.

Myanmar ram fimcawnnak zung Deputy Minister U Win Maw Tun nih, “PPTT Training a kai ding lak tik ah mahle hmunrammi upavo pek in thim an si ko. 2018 thawk in cuti ning cun kan rak kalpi cangmi a si,” tiah a chim.

2019-2020 cacawn kum ah PPTT training kai ding in Thantlang ca ah minung 21 thim an si i cu chung ah cun Thantlang peng khuasa taktak minung 4 lawng an i tel i a tam u 17 cu a dang ramkulh le ramthen in minung pawl an si hna, tiah MP Ni Sui Lian nih a langhter chap.

Latest News