Sangte Le a Fapa Yangon Bus Station in an Tlau

| The Chin Journal | Hakha, Chin State

Nizan nai ah Chinmi lawng si loin Myanmar rammipi lungrethei le ngaihchia in a umtertu Chin nu Sangte le a fate cu Yangon zatlang bu Shwe Kyar bawmhnak in Yangon khua Aung Mingalar Bus Station i Hakha Mann gate tiang an thlah nain motor kai ah a tlau, tiah thawng kan theih.

Hi kong he pehtlai hin Hakha Mann Gate (Hakha) tuanvo ngeitu nih, “Kan motor a phan cang nain mah hna nufa kha an rak phan lo. Yangon i motor kai lai ah an kawl lengmang hna nain an hmu hna lo,” tiah The Chin Journal ah a chim.

Cun, Yangon khua i Hakha Mann Gate tuanvo ngeitu zong nih, “Motor chuah lai ah an kawl i an hmu lo. Hakha zong ah a phan lo an ti,” tiah a chim ve.

“Mibawmtu bu nih khan motor a chuah tiang umpi hna sehlaw a tha hnga. An kawl i an hngah lengmang nain an hmuh lo tikah kan motor mongtu zong Laitlang lei ah cuticun a rak i thawh ko,” tiah Hakha khua i Hakha Mann Gate tuanvo ngeitu nih a chim.

Sangte cu Falam peng, Farso khuami a si. “Kum 19 ka si in Yangon ka phan i nau ka pawi lio ah ka vapa nih a kaltak,” taih a chim.

Hakha Mann Bus ah July 23 zinglei sml. 8:00 hrawng ah mibawmtu nih Sangte le a fapate cu an thlah hna nain chun sml. 12:00 hrawng ah Yangon khuachung Sule kiangkap ah pa pakhat he an ummi a hmutu zong an um.

Cucaah, mah Sangte timi nu hi harnak a tong ngaingaimi maw a si, asiloah, hlenthawi ruah hrimhrim ah atu bantuk hin thil a tuahmi dah a si timi fiang in theih a si lo.

Sihmanhsehlaw, amah a bawmtu zatlang bu “Shwe Kyar” nih cun mihlenghmang a si, Ks. 120,000 hrawng a kan hlen. Hakha tlun loin Sule hrawng ah pa pakhat he kan hmuh than hna, tiah an chim.

Latest News