Sami Ralzam Siangngakchia Pawl Zanlei ah Sianginn Kaiter an Si Lai

| The Chin Journal | Hakha, Chin State

Sami khua ah a ummi ralzam siangngakchia pawl cu COVID-19 zawtnak sining hoih in zanlei ah sianginn kaiter an si lai, tiah Sami High School caankarlak sayagyi a simi U Van Saung nih a chim.

“Ralzam siangngakchia hi atu tiang cazin ning ah cun 1,030 hrawng an si. Sami khuachung siangngakchia zong 1,200 leng an si. Sami khuachung siangngakchia pawl hi zinglei ah kan kaiter hna lai i, ralzam siangngakchia pawl hi zaanlei ah kaiter an si lai. Cuticun phu hnih in kan tthen hna lai,” tiah sayagyi nih a chim.

Ralzam siangngakchia pawl cacawn nakding ca ah COVID-19 Fund hmang in inn pahnih sak ding zong timhtuah a si.

“COVID-19 Fund naite ah a tlami a um i cu tangka cu hmang in ralzam siangngakchia hna ca ah cacawnnak inn pahnih sak ding in meeting ah kan ceih. Zeitik ah kan sak lai timi belte a fiang rih lo,” tiah sayagyi nih a chim.

Khua an rak zaamtak lio ah zei thil hmanh i phorh man loin an rak tlik caah ralzam siangngakchia le ralzam sayate zong sianginn kainak uniform le cacawnnak thilri (cauk, cafung, zal, cazohnak mei tbk) pawl an chambau ngai hna i bawmh kan herh ko, tiah ralzam sayama a simi Daw Khin Ma Win nih a langhter.

Latest News

News in Burmese