Sami Khua i Chin Ralzam Hna Lak ah Kum 95 a Simi Mitcaw U Lung Cuai aa Tel Ve

| The Chin Journal | Hakha, Chin State

Sami khua ah a rak zaami Chin ralzam hna lak ah kum 95 a si cang i, a mit a cawmi U Lung Cuai zong aa tel ve.

U Lung Cuai hi Paletwa peng, Misa (1) khuate ah chungkhar he nuam tein khua a sami a si nain March 14 le 15 i AA le Kawl ralkap kahdohnak ruang ah Sami khua ah a rak zaam vemi a si.

Fapa pathum le fanu pakhat a ngeimi a si i, ralzam 3,000 hrawng an umnak Sami khua ah a fale nih an rak zaampi ve.

Khumi holh lawng a thim i, a mit a cawt pin ah a hna zong a tthat tuk ti lo caah biaruah a har ngaingai cang. A fapa U Aung Ling nih holh a kan lehpiak i cuticun bia kan ruah.

Khua pawngkam ah ral a tho i ttihphannak in ka khah ruang ah ka rak zaam ve, tiah U Lung Cuai nih a chim.

“Tlun khawh si sehlaw khua ah tlun ka duh cang” – U Lung Cuai

“Ral ka ttih ruang ah ka rak zaam ve. Tlung khawh si sehlaw cu tlun ka duh tuk cang. Hika ralzam umnak ah hin tirawl lei in cun a tlamtling tuk ko. Bawmhnak a kan petu nan dihlak cung ah kaa lawm tuk,” tiah a chim.

Sami ralzam camp ah acozah bawmhnak thawng in le ramchung ramleng Chinmi hna bawmhnak thawng in eidin lei in a tlamtling ko nain U Lung Cuai ca ah cun harnak pakhat a um.

U Aung Ling nih, “A zei dang cu a tlamtling ko. Asinain, ka pa hi mitcaw a si i, hikahin cun zunpi zunte kal tik ah aa harh ngaingai. Kan puak i kan kalpi tawn. A si khawh cun a umnak inn he aa tlai in zunput tuahpiak kho u sihlaw a tlamtling tuk hnga,” tiah a chim.

U Lung Cuai amah pumpak saduhthah cun ral hi dai sehlaw an khuate ah tlun tthan a duh nain AA le Kawl ralkap kahdohnak pehzul in a um caah zeitik tiang dah ralzam camp a um ve rih lai timi theih a si lo.

Miza khua ah a zaammi Pu Tawn Alh

U Lung Cuai he tthi khat a simi U Tawn Alh (kum 95) zong 2017 lio i, Myanmar-Bangladesh ramri AA le Kawl ralkap kahdohnak ruang ah Miza khua ah ralzam dirhmun in a rak zaam ve.

Latest News

News in Burmese