Salai Diamond nih Hakha Sizung in Chuahmi Chungkhar Alak in Inn a Hlanh Hna Lai

| The Chin Journal | Hakha, Chin State

Min Cung Sang | Hakha, Chin-Oo-Sii sang ah a ummi tlangval Salai Diamond nih Hakha sizung quarters in chuah a tongmi chungkhar pakhat alak tein a inn hlanh an timh hna, tiah thawng kan theih.

Ralkap uknak tnag ah rianttuan kan duh lo tiin CDM ah aa telmi Hakha sizung rianttuantu chungkhar 115 cu March 12 ah ralkap le palik nih an umnak sizung quarters in an chuahter dih hna.

Salai Diamond nih, “Ralkap nih kan sii saya/sayamate an umnak in an tthawl dih hna tik ah keimah pumpak zong nih an thil tthial ka bawmh hna i, micheukhat cu lungrethei tuk in an ummi ka hmuh hna. Cucaah, zeital ka tuahpiak khawhmi hna a um hnga maw tiah ka ruah i, ka innte ah hin khuasa hna seh ka ti,” tiah a chim.

Salai Diamond

Salai Diamonh hi Hakha a ule he khua a sami si i, a nulepa le a dang a unau pawl cu ramdang ah an um hna.

“Inn ka hlanhmi hna cu ralkap uknak caan chung paoh alak in ka inn ah hin ka umter ko hna lai. Ti man le mei man zong ka liampiak hna lai. Atu bantuk in ka inn ah umter ding in timhtuahnak ka ngeih tik ah ramdang ah a ummi ka nulepa zong an rak i lawm tuk ve,” tiah a chim chap.

Salai Diamond nih a inn ah a umter dingmi chungkhar he bia an i ruah lio a si i, a tlamtlin ahcun a rauh hlan ah a umter cang hna lai.

Hakha sizung in chuah a tongmi ngandamnak lei rianttuantu chungkhar pawl alak in inn hlanh a timtu a dangdang minung zong Hakha ah an um pah hna, tiah thawng kan theih.


Forhfialnak: Sizung Quarters in chuah ruang ah harnak a tongmi hna ca ah alak in inn hlanh a timtu nan theih hna ahcun pehtlaihnak an phone le address kan kua u law, The Chin Journal nih pumpak in biaruahnak kan ngeih hna lai. The Chin Journal Facebook Page i Chatbox ah cakuat khawh kan si pin ah chinjournal.com@gmail.com zong ah cakuat khawh kan si.

Latest News

News in Burmese