Sagaing Ramtthen ah SAC Ralhrang 40 Hrawng Nihin ah an Thi

| The Chin Journal | Hakha, Chin State

Nihin (July 9) ah Sagaing ramtthen, Sweku peng ah KIA le PDF i bawm in SAC ralhrang an kah hna i SAC lei minung 40 hrawng an thi, tiah Kachin thawngzamhnak KNG nih a langhter.

Kahdohnak a chuahnak hi Sweku peng, Minhlah khua pawng ah a si i, Minhlah khua i zatlang mibawmtu bu pawl cu SAC ralhrang nih ruak char ding in an fial hna.

“Tu zaanlei sml. 6:00 hrawng SAC ralhrang pawl an ra i mibawmtu zatlang pawl cu ruak char ding in hramhram in an fial hna. Mibawmtu pawl motor 10 hrawng in an kal. SAC ralhrang a thimi 40 hrawng an si. Asinain, kahdohnak pehzul in a um i fiang in thil sining theih a si lo,” tiah Minhlah khuami pakhat nih a chim.

Nihin chun sml. 2:00 hrawng ah KIA pawl hmun an khuarnak Minhlah khua pawng ah SAC ralhrang milu 160 hrawng an kal i, landmine in KIA le PDF nih an puah hnawh caah ralhrang tampi an thih hi a si.

SAC ralhrang 40 hrawng an thih hnu ah SAC nih fighter jet pahnih nih KIA le PDF cu an kah hna.

KIA le PDF lei in ralkap minung 6 hrawng an nunnak a liam, tiah KNG nih a langhter.

Atu an i kahnak hmun hi KIA Brigade No. 8 tang ah a ummi Battalion No. 5 nih an humhakmi hmunram a si.

Advertisement

Thawngpang Thar