SAC Ralhrang Kut in KIA Ralkap 4 an Nunnak a Liam

| The Chin Journal | Hakha, Chin State

Nihin (May 26) zaanlei ah Sa Du Suat khuate ah SAC ralhrang kut in KIA ralkap 4 an nunnak a liam, tiah theih a si.

Ja-Htu-Zup khuate i Pyi-tuh-sit (ပြည်သူ့စစ်) lutlai U Min Zin Thanh thah ding in KIA ralkap 7 nih nihin zanlei sml. 3:00 hrawng ah an vung kal hnawh i ready in a rak hngaktu SAC ralhrang 50 hrawng nih an rak kah hna.

KIA nih an ka rat hnawh lai timi U Min Zin Thanh nih thawngpang a thei cia ruang ah SAC ralhrang bu Kha La Ya No. 297 sin ah bawmhnak a hal i, a inn velchum ah SAC ralhrang 50 hrawng nih ready in KIA pawl an bawmh hna hi a si.

Motor pakhat in a rak phanmi misawhsawh thilpuan aa hruakmi KIA ralkap pawl cu U Min Zin Thanh inn an phak lecangka in ready in a rak i thupmi SAC ralhrang pawl nih a kenkip in an rak kah hna.

A hmun ah KIA ralkap 4 an nunnak a liam i, a dang pathum hi an zaam khawh caah nunhim in an um.

KIA ralkap he aa pehtlaimi minung pakhat nih, “U Min Zin Thanh inn ah KIA an ra lai timi an theih cia lo ahcun atu bantuk in ready in an um lai lo. Thawngpang an theih cia i a si lai. Khatlei khel cun vantthat deuh a si. A dang pathum nunhim in an luat kho,” tiah a chim.

KIA nih an kah hnanak ah U Min Zin Thanh cu zeihmanh hliam a pu lo nain a hawipa Aik Lwin timi pa hi hliamhma a pu.

KIA nih thah ding in an kal hnawhmi U Min Zin Thanh hi SAC ralhrang kut tang Pyi-tuh-sit hruaitu a si bang in Ja-Htu-Zup khuate hrawnghrang ah ritsi zuarnak le ngunkhuai pek loin suikhor cawhnak rian pawl a ttuanmi a si, tiah Kachin thawngzamhnak nih an langhter.

Cherhchan: KNG, 7Stars News

Latest News

News in Burmese