Rohingya Miphun Cihmih Lainawnnak Kong ah Suh Kyi Tazacuai a Tong Kho

| The Chin Journal | Hakha, Chin State

Rohingya kong he pehtlai in Myanmar rampi ruahnak petu Aung San Suh Kyi tazacuai a tong kho men, tiah UN tang ah rian a tuanmi Independent International Fact-Finding Mission on Myanmar (Myanmar-FFM) nih September 17 ah a langhter.

“Kawl ralkap nih Rohingya pawl cung ah an tuahmi nuhrin covo buarnak kong ah Aung San Suh Kyi pumpak zong tuanvo a ngei ve ko lo maw ti hi biahalnak tuah awk a um,” tiah Myanmar-FFM a hruaitu Mr. Marzuki Darusman nih a chim.

September 17 ah UN nih a chuahmi Rohingya kong report ah “Myanmar ram ah a taang rihmi Rohingya milu 660,000 hrawng cu a phunphun in namnehnak le harnak an tong rih,” tiah a langhter.

Rohingya pawl miphun cihmih an ton nakhnga lo khenkham ding in Myanmar ram nih tuanvo a tlolh. Miphun cihmih lainawnnak a tuahtu pawl hlathlai le upadi ning in dantatnak tuah zong Myanmar nih a tlolh, tiah cu report nih cun a langhter.

Myanmar rammipi hruaitu a simi Aung San Suh Kyi cu Democracy kong ah le harnak a tongmi minung hawi cung zaangfahnak le zawnruahnak a ngei tiin Nobel laksawng tiang rak pekmi a si nain Rohingya nih an tonmi miphun cihmih lainawnnak kong ah i thlak loin thazaang pek lei bantuk tu in a um caah tazacuai a tong kho ve, tiah Myanmar-FFM nih a langhter hi a si.

-Myanmar-FFM

Latest News