Rohingya a Si Ruang ah Kum 20 Nungak University in an Phuah

| The Chin Journal | Hakha, Chin State

Bangladesh ram, Cox’s Bazaar ah a ummi Cox’s Bazaar International University (CBIU) nih kum 20 a simi Rahima Akter Khushi cu Myanmar in a zaammi Rohingya ralzam a simi an theih hnu ah University in an phuah, tiah theih a si.

CBIU ah Vice Chancellor a simi Abul Kashem nih, “Rohingya cu ralzam an si caah kan University ah fimcawnnak nawl pek an si lo. Ramdangmi cu rak kai khawh a si nain zulphung a dotdot an tlinh a hau ve,” tiah a chim.

CBIU in phuah a tongmi nu hi upadi (Law) a cawngmi a si i, Bangladesh ram, Chittagong in High School awnnak catlap zong a ngei.

CBIU nih committee an ser i ralzam nih zeitindah High School awnnak catlap a ngeih khawh i University tiang a phak khawh timi hlathlainak tuah ding in timhtuahnak an ngei.

2018 ah khan Rohingya ralzam camp ah Associate Press (AP) nih biahalnak a rak tuah hna i Rahima Akter Khushi hi ralzam lak ah a rak um. Cu lio ah cun AP nih bia zong a rak hal ve.

(A cung video file hi CBIU nih an hmuh hnu ah atu bantuk in phuah a tong)

AP nih October 10, 2018 ah a rak thlahmi minute 1:30 a saumi video ah Rahima Akter Khushi nih fimthiamnak cawn i hmailei a chunmang kong a chimmi video cu CBIU nih an hmuh tik ah an phuah.

-AP, Press TV

Latest News