Ritsii in Tarh a Tongmi Nurse Nute Biaceih Zung Nih Sualnak a Ngei Lo Tiah a Thlah

| The Chin Journal | Hakha, Chin State

A motorcycle chung ah ritsii an chiahpiak hramhram hnu ah tlaih a tongmi Nurse nute  Daw Than Than Myint (43) cu Gangaw peng biaceih zung nih sualnak a ngei lo tiah a thlah thai cang, tiah theih a si.

Hi thil a rak ton hlan ah Daw Than Than Myint nih Naypyidaw Times thawngzamhnak riantuantu lutlai Wa Ring Moe timi pa cu taza a rak cuai.

Taza a cuainak aruang cu Wa Ring Moe timi pa nih Dawt Than Than Myint cu a ihpi hnu ah a thit lo pin ah an ih ti lio video zong online a hun kai caah a si.

Daw Than Than Myint hi Kalaywah peng, Thitkyauk khuate ah rian a tuanmi a si i, Wa Ring Moe taza a cuainak Gangaw peng biaceih zung in a tlun lei, Saidu khualuhnak ah palik nih an check tikah WY rithaisii tlang 18 he September 2018 ah khan an rak tlaih.

Sihmanhsehlaw, a motorcycle chung ah an chiahmi ritsii tlang 18 hi amah nih a phorhmi si loin biaceih zung chung a luh karlak ah Wa Ring Moe nih a fialmi minung pawl nih an rak chiahpiak hramhrammi a si tiah an zumh.

July 15 ah Gangaw peng biaceih zungpi nih rithaisii hi sayama Than Than Myint nih a phorhmi a si lo; sual tarhnak ca ah an chiahpiak hramhrammi a si tiah a ti i a thlah than, tiah theih a si.

-Sandaw Ching

Latest News