Reuters Thawnglatu Pahnih Chungkhar He Nuam Ngaiin an i Tong Kho Cang

| The Chin Journal | Hakha, Chin State

Reuters thawnglatu pahnih Ko Wa Lone le Ko Kyaw Soe cu May 7 ah Myanmar President ngaihthiamnak in thlah an si i, chungkhar he nuam tein an i tong kho cang, tiah theih a si.

Ko Wa Lone le Ko Kyaw Soe cu Rohingya thahnawnnak kong thawngpang an lakmi ruang ah September 2018 ah khan kum 7 thongthlak ding in dantatnak an rak pek hna.

Kawl ralkap le Rakhine khuami hna nih 2017 ah khan Rohingya minung 10 ruru hranghrang in an rak thah hna i vawleikhor ah an rak phum hnanak kong hlathlainak an tuah ruang ah an tlaih hna hi a si.

Thildik thilhmaan tanh in rian an tuahmi kong ah thongthlak an ton tikah US le UN telh in vawleicung nuhrin covo bu hna nih Myanmar ram biaceihnak cung ah an lungtlin lonak faak piin an rak langhter.

2019 Kawl kumthar ah Myanmar President in ramchung thongtla ngaihthiamnak voi thum a tuah i atutan ah Ko Wa Lone le Ko Kyaw Soe zong nih ngaihthiamnak hmu in luatnak an hmuh ve hi a si.

-Mizzima

Latest News