Rawldawr Hmai ah Ngakchia Nute a Kaltakmi Nu Palik Nih an Tlaih

| The Chin Journal | Hakha, Chin State

Nizan tihni June 21 ah khan Mon ramkulh, Thanpyozayat khuachung i rawldawr pakhat hmaika ah naupawi lio nutung pakhat (Angki Hring) nih ngakchia nute a kaltak hramhram ruang ah cu nu cu palik nih an tlaih, tiah theih a si.

Ngakhia nute a tah buin amah lawng a ummi an hmuh tikah palik thawng an thanh hna i hlathlainak an tuah.

Palik nih rawldawr i CCTV an zoh tikah naupawi nu pakhat nih hi ngakchia nute hi a rak i ratpimi an hmuh.

Naupawi nu nih ngakchia nu cu rawldawr pawng ah a kaltak i amah cu Yee khua lei ah a kalmi motor cung ah a kai i a kaldiam. Thil sining vialte cu CCTV hmang in palik nih an hmuh dih.

Cucaah, naupawi nu aa citmi motor mongtu pa cu phone an chawnh zokzok i lam tantim ah motor cu an dirter hnu ah minu cu an tlaih.

Palik zung ah naupawi nu le ngakchia nu cu bia an hal hna i naupawi nu nih, “Ka theihmi ngakchia a si lo, keimah nih ka ratpimi a si lo,” tiah palik sin ah a chim.

Asinain, ngakchia nute nih cun amah nih hika ah a rak ka ratpi ko, tiah palik sin ah a chimphuan ve.

Naupawi nu hi ngakchia nute i a nu a rak si lo. Ngakchia nute a nulepa cu Yee khua ah an um.

Palik nih a nulepa cu an chawnh hna i an auh hna. Kan fa a si ko tiah an ti hnu ah nulepa sin ah ngakchai nute cu an ap. Asinain, naupawi nu cu palik nih an tlaih i hlathlainak an tuah cuahmah.

Naupawi nu le ngakchia nute hi zeitindah an i pehtlaih i Thanpyozayat khua ah a ratpi timi fiang in theih a si lo pin ah zei ruang ah dah/zeitindah naupawi nu nih ngakchia nute hi a rak i hruai timi kong zong palik nih hlathlainak an tuah cuahmah lio a si.

Latest News