Ramri Tivakam ah a Vuanmi Pafa Hna Ruak Nih Milung a Fahter Hringhran

| The Chin Journal | Hakha, Chin State

US le Mexico ramri ah a ummi Rio Grande tivakam ah a vuanmi pafa hna ruak a hmutu vialte lungfak le ngaihchia in an um hna, tiah theih a si.

Kum 25 a simi Oscar Alberto Martinez Ramirez le a nupi Tania Vanessa Avalos, cun, kum 1 le thla 10 a simi a fanute Valeria cu US ram ah luh ding in Zarhpi Ni ah khan Rio Grande tiva cu an tan.

Oscar nih a fanute cu aa pom i US lei hraap tivatlang ah a chuahpi hmasa i cukacun a umter chung. Cu dih cun a nupi vung lak awkah a vung kir.

Sihmanhsehlaw, ngakchia nute Valeria cu a pa sin kal ve awkah ti chung ah amah tein a rung zung ve.

Tiva lai hrawnghrang a phan cangmi a pa cu a fanute ti chung a rak zuan vemi a hmuh tikah a fanu khamh awk ah a saimahrang in a kir than.

A fanute sin ah a phan kho ko nain tihrah a fah tuk cang ah an pafa tein ti nih a fenh hna i an nunnak a liam.

Tivakam ah a vuanmi an ruak zoh tikah a fanute nih a pa cu a hnawng in fek tein aa kuh pengmi hmuh khawh a si.

Oscar te chungkhar i Central America ah a ummi El Salvador rammi an si. Pawcawmnak ah har ruang ah US ah kal ding in April 2019 ah khan an ram an chuahtak.

Cu dih cun Mexico ah caan zeimawzat an um hnu ah US ah luh ding in tanglei lam in an i tim i atu bantuk in vanchiat an ton hi a si.

-Daily Mail

Latest News

News in Burmese