Ramri Hauhruang a Bauhnak Zawn in a Lutmi Myanmar 20 an Tlaih Hna

| The Chin Journal | Hakha, Chin State

Malaysia ramchung an luhnak suimilam tlawmpal lawng a rau rihmi Myanmar minung 20 cu June 29 ah Malaysia ram Bukit Kayu Hitam khua inn pakhat chung an tlaih hna, tiah theih a si.

Bukit Kayu Hitam cu Malaysia ramchung, Thailand he ramri pawngte ah a ummi a si i, hi Myanmar 20 hi Thailand le Malaysia ramri hauhruang a bauhnak zawn in a rak lutmi an si, tiah Malaysia ralbawi Brigadier-General Mohd Halim Khalid nih a chim.

Bukit Kayu Hitam khua i datsi dawr pawng i inn pakhat chung ah Myanmar pawl cu puaisa pawl nih an chiah hna.

Malaysia ralkap “6th Royal Rangers Regiment” (6RRD) nih an luh hnawh hna i an zapi tein an tlaih hna.

Tlaih a tongmi Myanmar pawl hi kum 20-30 karlak pa lawngte an si. Puaisa nih riantuannak hmun ah an kalpi manh hna hlan ah an tlaih hna hi a si.

Myanmar pawl a tlaitu ralkap bu i an bawi Major Prabhakaran Rajagopal nih, “Malaysia ramchung ah rian nan hmu lai tiin puaisa pawl nih an ti hna i an rak luhpimi hna an si,” tiah media sin ah a chim.

Tlaih a tongmi Myanmar 20 cu Bukit Kayu Hitam khua i Immigration Department ah an ap dih hna, tiah theih a si.

-The Sun Daily

Latest News