Rammi 5 Bomb Nih a Tlak Hna Kong ah Kawl Ralkap Le Northern Alliance Sual an i Puh

| The Chin Journal | Hakha, Chin State

Shan ramkulh nichaklei Kuatkhaing khua ah aho hriamtlai nih an kah timi theih lomi Mortar Bomb nih chungkhar pakhat inn a run tlak i thla 5 bawhte le nu pakhat telh in minung 5 an nunnak a liam.

Hi thil a can hi August 31, zinglei sml. 10:00 hrawng ah khan a si i, Kuatkhaing he aa naihte ah a ummi Mawhit khuate i U Zaw Boh te chungkhar inn cung ah bomb a rak tlak hi a si.

Bomb nih inn a tlak lecangka in innchung ah a ummi minung 8 chung ah 4 an nunnak a liam colh i a dang pakhat sizung an phakpi ah a nunnak a liam ve.

Cu kong he pehtlai cun mah bomb a kaptu Northern Alliance an si tiah Kawl ralkap nih an puh hna bang in Northern Alliance zong nih Kawl ralkap an si, tiah an puh ve hna.

Kawl ralkap nih, “Inncung ah a tlami bomb a hawng kha ralhriam lei thiamsang hna nih an zohfel i, kanmah Kawl ralkap nih serchauhmi bomb a si lo. Ral pawl nih an rak kahmi tu a si,” tiah cathanh an chuah.

-7Day News Journal

Latest News