Ramkulh Nawlngeihnak Chap Deuh Si Sehlaw Hinakhin kan Thangcho Deuh Lai| CM Lian Luai

| The Chin Journal | Hakha, Chin State

Ramkulh cozah nawlngeihnak hi rak kan chap deuh hna sehlaw atu nakhin kan tthangcho deuh ko lai, tiah Chin ramkulh Chief Minister Salai Lian Luai nih December 20 ah Naypyidaw ah a chim.

December 20, zanlei sml. 6:00 ah Naypyidaw ah Chin ramkulh sipin vuanci U Soe Htet nih Christmas zaanriah dumnak a tuah i cuka hmun ah cun Salai Lian Luai nih atu bantuk in a chim hi a si.

“Company pawl nih Chinram ah leichukchuak cawh riantuan kan duh, Hydropower lei tiantuan kan duh tiah a kan chimh tawn. Asinain, hi bantuk caan ah hin Chin ramkulh cozah nih amah tein biachahnak nawl a ngeih lo caan zong a um. Nawlngeihnak faparek telawng kan ngei; Chin ramkulh cozah nih cun kan hnatlakpi ko hna ti tiang cu kan tuah khawh i a dihdonghnak bik tiang biachahnak le nawlngeihnak a ngeitu cu Pyidaungsuh cozah a si,” tiah Chief Minister Salai Lian Luai nih a chim.

“Ramkulh nawlngeihnak kong he pehtlai in upadi zong Hluttaw ah remh ding in an tawlrel cuahmah lio a si i, a tlamtling tiah ruahchannak kan ngei. Ramkulh hna sin ah nawlngeihnak uak deuh a kan pek ahcun hinakhin kan tthangcho deuh tuk ko lai,” tiah a langhter.

Cun, lenglei mi hna nih Chin ramkulh cozah cu zeihmanh a tuah kho lo, san a tlai lo tuk, zei hmanh an thiammi a um lo tiah a kan soisel. Ramkulh cozah nih tuahnak nawl a ngeihnak kaazawn a um bang in Pyidawngsuh cozah lawng nih biachahnak nawl a ngeihnak kaazawn zong a um ve i, hmailei upadi remh khawh a si tik ah cun thil sining a ttha deuh te ko lai tiin ruahchannak ka ngei, tiah Chief Minister Salai Lian Luai nih a chim chap.

Latest News