Ramdang in a Rak Tlungmi Pawl Yangon ah Quarantine Chiah Dih Si Cang Lai

| The Chin Journal | Hakha, Chin State

Ramdang in Myanmar ram ah a rak tlungmi vialte cu mahle umnak ramkulh le ramtthen ah lanhter ti loin Yangon ah Quarantine chiah dih an si cang lai, tiah Yangon ramtthen Immigration vuanci Daw Moe Moe Suh Kyi nih a chim.

Naite ah Malaysia in a rak tlungmi bu khat cu Yangon ah Quarantine chiah loin an umnak ramtthen le ramkulh ah lanhter an si i, cu hna chung cun COVID-19 zawtnak a ngeimi pawl an hmuh hna.

“Yangon ramtthen cozah nih ahohmanh Quarantine chiah ta loin kan lanhter hna lo. Asinain, ramkomh cozah lei in nawlpeknak a um ruang ah nai i Malaysia bu khat kha kan lanhter hna. Asinain, atu cu khoika ram in a rami paoh an si ah Yangon ah Quarantine kan chiah cang hna lai,” tiah Daw Moe Moe Suh Kyi nih a chim.

Myanmar cozah nih Malaysia in a lakmi hna chung in minung 11 cu COVID-19 zawtnak an ngei tiah hmuh an si caah Yangon ramtthen cozah nih ramdang in a tlungmi paoh Yangon ah Quarantine chiah ta ding in a hun timhtuah hi a si.

May 16 le 23 karlak ah Myanmar ram ah COVID-19 zawtnak a ngeimi minung 20 an i chap i, cu chung ah cun minung 19 cu Myanmar cozah nih ramdang in a lakmi hna an si, tiah theih a si.

Cherhchan: Duwun

Latest News

News in Burmese