Ramchung Ramleng Chinmi Le VP Henry Van Thio Hlutmi Facang Paletwa a Phan

| The Chin Journal | Hakha, Chin State

Ramchung le ramleng ah a ummi Chinmi hna le Vice President Henry Van Thio nih ralzam ca ah an hlutmi eidin le facang pawl cu nihin zanlei sml. 3:00 ah Paletwa ah an phan cang, tiah thawng kan theih.

Paletwa ah a phanmi facang tun (830) chung a tam u hi ramchung le ramleng Chinmi hna nih Paletwa ralzam ca ah tiin nan hlutmi pawl an si.

Cu chung ah cun Henry Van Thio nih a hlutmi facang tun (200) zong a tel.

April 6 ah khan Paletwa khuachung i ralzam 3,700 ca ah motor (10) in Sami khua in facang an rak phorh i, lampi ah AA hriamtlai nih hnahnawhnak tete a um ca ah Sami-Paletwa hi meng 40 hrawng lawng a hlat nain ni 3 hnu ah an hun phakpi khawh hi a si.

Sami le Paletwa karlak ah Kawl ralkap le AA kahdohnak a um bang in AA nih facang phortu pawl tlerhkhawn in an kah hna ca ah ni 3 chung lampi ah an i hreng

Nizan ah khan Paletwa khua ah luhpi awk a si cang nain Paletwa he meng 4 hrawng a hlatnak hmun ah AA nih meithal in an rak kah hna ca ah an motor pawl an kir tthan.

Nihin belte cu tlamtling in an phakpi khawh i facang pawl hi Paletwa khuachung ngaingai phakpi awk ah tilawng in an thiar hna.

Paletwa khua ah hin ralzam 3,700 hrawng an um i eidin tirawl lei in an harsak ngaingai.

Paletwa pehtlaihnak ca ah Sami lei lawng in lam a awng ca ah lampi ah kahdohnak le AA tlerhkhawnak a um ko nain Chin zatlangbu le biaknak lei hruainak in an hun nor i atu ah Paletwa ah facang an hun phakter khawh hi a si.

Latest News

News in Burmese