Ram Thlennak Ca ah NLD ah i Bung Ko U Sih a Titu MP Ni Sui Lian Thimnak ah aa Cuh Than Lai

| The Chin Journal | Hakha, Chin State

Kan ram uknak aa thlen khawh nakhnga NLD Party ah i bung ko rih u sih tiah a titu Pyituh Hluttaw MP Pi Ni Sui Lian cu aralaimi rampi thimnak ah aa cuh tthan lai, tiah thawng kan theih.

MP Pi Ni Sui Lian nih, “Chinmi ka si i Chin Party zong ah i pek ding ka si ko. Sihmanhsehlaw, nihin ni ah ram thlen hi kan duh. Hriamtlai pawl zong nih kum 30 leng hriam an tlai…sihmanhsehlaw, nihin ni tiang ah zeipipa a phi a chuak lo. Cucaah, ralkap uknak in mipi uknak Democracy ram ah kan ser tik ah hi Democracy rampi a kan serpi khotu ding hi cu NLD lawng a si ti hi kei cu ka zumh bak,” tiah MP Pi Ni Sui Lian nih The Chin Journal he biaruahnak ah a rak chim.

Pi Ni Sui Lian hi atutan thimnak ah cun Chin ramkulh hluttaw mekuang no. 2 (Thantlang) ah aa cuh cang lai.

2020 thimnak ah aa cuh tthan lai le cuh tthan lai lo kong ah 2019 kumdongh tiang ah khan cun amah Pi Ni Sui Lian pumpak zong a rak i faing rih lo i, mipi nih an kan duh ah cun kaa cuh tthan ko lai titu in a rak chim.

https://www.facebook.com/thechinjournal2017/videos/2161934677447232/

“Kan ram hi kum 53 chung a rak rawh tik ah a rawhnak hi a ngan tuk. Cozah rian kum 34 ka ttuan tikah kanmah pumpak nih kan tuarmi a rak tam tuk. kum 53 chung a rawkmi kum 2 kum 3 chung ah thlen ding cu a ngah loh…atu hmanh hi kei cu (NLD nih) tam tuk a tuah khawh ka ti. Dotu pawl nih phun dang in an chim ve ko lai. Khakha cu minung phung a si ko…kum 2020 zong hi NLD pi ah hin i fun rih ko hna u sih. Kan ram hi Democracy ah ser ta u sih,” tiah a rak chim chap.

Atulio Myanmar Vice President (2) a simi Pu Henry Van Thio zong Amyotha Hluttaw mekuang no. 1 (Thantlang) ah aa cuh tthan ve lai, tiah theih a si.

Latest News