Ralzam Bawmhnak Eidin Thilri Cheukhat AA Hriamtlai Kut ah an Phan

| The Chin Journal | Hakha, Chin State

Rakhine ramkulh, nichaklei ah a ummi ralzam camp pawl ah vawleicung NGO pawl nih bawmhnak an pekmi eidin tirawl le thilri cheukhat AA hriamtlai kut ah an phan, tiah theih a si.

Rakhine ramkulh chung lamsul a harnak hmunhma ah Red Cross (ICRC) hi kalnak nawl pekmi an si i, khuate uktu pawl kut ah an apmi ralzam bawmhnak cheukhat AA kut ah an phan, tiah Myanmar President zung chimnak nawlngei U Zaw Htay nih a chim.

“Mizapi kut cung ah phak loin AA sin ah a phak cu a si awk hrim a si lo. Hi ruang ah bawmhnak pek kong zong ah rianttuan ning kan i harh,” tiah U Zaw Htay nih a chim.

Rakhine nichalei ralzam hna sin ah hin ICRC lawng si loin zatlangbu tete zong bawmhnak pek ding in luhnak nawl pek cio an si i, atu hnu cun bawmhnak an pekmi thilri pawl ralzam sin ah an phak taktak le phak taktak lo ttha tein kan zohfel cang lai, tiah a chim chap.

Kawl ralkap nih Pungna Kyun ah a ummi AA hmunkhuarnak sakhaan pakhat cu April thlathawh lei ah khan an rak lak khawh i, cuka ah cun WFP bawmhnak eidin thilri le a dangdang bawmhnak pawl an hmuh hna hi a si.

Cherhchan: Irrawaddy

Latest News

News in Burmese