Ralkap nih UNHRC ah an Thlahmi Palai nih Zei Bia Dah a Chim?

| The Chin Journal | Hakha, Chin State

Nihin February 12 ah Myanmar ram kong he pehtlai in UN Human Rights Council (UNHRC) meeting an auh i Myanmar ralkap cozah (State Administrative Council – SAC) nih an thlahmi U Kyaw Moe Tun nih biachimnak a ngei ve.

U Kyaw Moe Tun nih, “Atulio hi Myanmar ram ah a hnoksak ngaimi ramkhel lei thlennawnnak a um lio a si caah vawleicung ram kip nih theihthiamnak na kan ngeihpiak lai tiah kan i ruahchan ko,” tiah a chim.

“State Administrative Council (SAC) nih thleidannak a ngei lomi ramleng policy kan i tlaih thotho rih lai i, kan ram ca ah COVID-19 sii hmuh khawh ding zong in pehzul in kan i zuam lai,” tiah a chim chap.

“Myanmar ram mipi nih a zungzal remhdaihnak le tthanchonak an hmuh khawh nakhnga UN he i bawm in rian kan ttuan tti lai,” tiah pehzul in a chim.

Asinain, US, UK, Denmark, Japan, South Korea le Europe ram pawl nih Myanmar ralkap nih uknak a lakmi cung ah fak ngaiin mawhchiatnak le duhlonak bia an chim.

Denmark nih, “Myanmar Ralkap nih an sermi SAC nih mipi cung ah ttihnung hranhramnak (Violence) a tuah pin ah nuhrin covo zong pehzul in a buar. Lamzawhtu pawl zong khenkhamnak phunphun an tong. Mah bu hin ralkap cozah nih zeitindah bawmhnak (Humanitarian Aids) an hal ngam rih,” tiah a chim.

Cun, Denmark ram cu ralkap uknak a dohtu Myanmar rammipi he fek tein kan dir lai i, ramchung zatlang bu hna sin ah bawmhnak direct in pek kan i zuam lai, tiah a nolh chap.

Cun, US le UK palai pawl zong nih Daw Aung San Suh Kyi le President Win Myint telh in tlaihmi vialte a rianrannak in thlah ding le ralkap nih nawlngeihnak a lakmi ap tthan ding in fak ngaiin an chim.

Tuluk le Russia nih cun “Myanmar ram ah a cangmi buaibainak hi anmah Myanmar ramchung kongkau a si caah anmah tein chimphoih ah a ttha” ti phun in an chim i, “Vawleicung ram kip zong nih Myanmar ram a nawlngeihnak (Sovereignty) hi upatpiak hna u sih,” tiah an chim.

Muslim ram pawl tu nih cun Myanmar ralkap nih uknak a lak ruang ah Bangladesh lei ah a zaammi Rohingya pawl Myanmar ram kirnak kong a donh sual hna lai timi thinphannak an langhter.

Nihin Geneva khua ah tuahmi Myanmar kong UNHRC tonpumhnak ah chungtel ram 47 an i tel i, UK le EU nih an chuahpimi Myanmar ram kong biachahnak cathluan (Resolution) cu dohdaltu um loin an cohlan.

Asinain, Russia le Tuluk nih cun vote thlaknak ah i tel loin karlak thlak in an um i, duh le duh lo zong an langhter lo.

Cherhchan: Irrawaddy, Reuters

Latest News

News in Burmese