Ralkap nih Myanmar Hrambunh Ramdang Embassy Pawl Ralrin Pek

| The Chin Journal | Hakha, Chin State

Myanmar ralkap nih Myanmar ramchung ah hram a bunhmi ramdang Embassy pawl ralrin a pek hna, tiah theih a si.

Ralkap nih uknak a chuh hnu ah lamzawhnak nitin in a fak chinchin i, palik pawl nih meithal kuanfang taktak hmang in mipi an kah hna ca ah atu tiang ah minung 4 an nunnak a liam i hliamhma a pumi minung 50 leng an si.

Cu kong he pehtlai cun Yangon i US Ambassador nih “Lamzawhtu pawl cung i ralhraim hmang in lehrulnak nan tuahmi ngol zokzok u,” tiah ca a chuah.

Cun, UK le Canada Embassy zong nih lamzawhtu cung i ruru hranghrang in tuahtonak pawl ngol ding in a awaan an langhter i Myanmar ralbawi dantat an i huahmi kong ah lungtlinnak an langhter ve.

Cu lawng si loin Japan le Tuluk zong nih Myanmar palik nih lamzawhtu cung i ralhriam hmang in tthenhmalnak a tuahmi cung ah duhlonak le lungretheihnak an langhter.

Yangon khuachung i ramdang Embassy hmai ralkap uknak duhlonak a langhtertu Myanmar mipi cu ramdang Ambassador pawl nih pumpak in bia an ruahnak hna i thazaang zong an pek tawn hna.

Cucaah, Myanmar ralkap nih, “Yangon hrambunh ramdang Embassy cheukhat le ramleng lei nih an chuahmi cathanh pawl zoh tik ah Myanmar ramchung kong ah langhngan ngaiin an i thlakmi a lang. Myanmar ramchung thilcang kong ah nan i thlak len awk a si lo. Myanmar ram i upadi pawl nan upat awk a si ve,” tiah Myanmar ramleng vuanci zung hmang in February 21 ah ralrin peknak bia an chim.

Myanmar ralkap nih February 1 ah NLD kut cung in uknak a chuh hnu, a ni sarihnak Feb.7 thawk in Yangon khuachung i ramdang Embassy hmai kip ah ralkap uknak duhlo langhternak tuah a si.

Abikin, UN zung hmai, US Embassy hmai, Japan Embassy hmai, Siangapore Embassy hmai, Tuluk Embassy hmai le Russia, French, Norway, S. Korea le Brunei Embassy hmai tibantuk pawl ah nitin in ralkap uknak duhlo langhternak tuah a si.

Cherhchan: Irrawaddy

Latest News

News in Burmese