Ralkap Chuahmi Vote Cazin ah Chinram ah Dotlalo Vote 50,000 Leng an Um

| The Chin Journal | Hakha, Chin State

Myanmar ralkap nih November 2020 thimnak ah vote a thlatu hna cazin anmah tein an check tthanmi ah Chin ramkulh chung ah ningcang loin thlakmi vote 50,331 a um, tiah an langhter.

USDP le Ralkap nih November 2020 thimnak ah vote ningcang loin thlaknak a um tiah an ti caah ralkap hruainak in vote rel tthannak an tuah i, atu tiang ah rel tthanmi vote cazin voi 26 an chuah cang.

Ralkap nih vote rel tthannak an tuah hlan ah Union Election Commission (UEC) sin ah vote thlatu hna i konglam (min, umnak address, rianttuanmi, hmatpungttin tibantuk) aa tel dihmi cazin an hal.

Asinain, ramchung vote thlatu hna i konglam dikthlir aa telmi cazin leng ah chuahter/bu dang kut ah pek cu rampi thimnak upadi he aa kalh, tiah UEC nih a ti i ralkap nih an halmi cu an pe hna lo.

January 28 ah Ralkap nih an chuahmi vote reltthannak cazin

Cucaah, ralkap nih anmah tein an hmuh khawhmi cazin hmang in vote relnak an tuah i, November 2020 thimnak Myanmar ram huap in vote ningcang loin thlakmi dotlalo vote ting 100 (28%) leng a um kho, tiah January 28 ah an chuahmi cazin ah an langhter.

November 2020 ah Myanmar ram huap in vote a thla khotu milu hi kan zapi ah ting 380 leng kan si.

Ralkap chuahmi cazin ah Chin ramkulh chung peng/myone pakhat ah vote voi khat leng a thlatu 27,000 leng an um an ti.

Cun, peng dang veve ah min/hmatpungttin aa khatmi hmang in vote thlakmi 5,500 leng aum tiah an an langhter.

Kum 18 a tling lomi vote thlatu 205 an um i, kum 100 cung tar vote thlatu 177 an um tiah an langhter chap.

Cu lawng si loin, hmatpungttin (NRC) ngeih lo buin vote cazin ah aa telmi minung 17,000 hrawng an um tiah ralkap cazin ah cun an langhter.

Ralkap nih vote check tthannak ca ah an hmanmi cazin hi khoika ah dah an lak timi theih a si lo.

November 2020 thimnak ah official in hmanmi vote cazin tlamtling cu UEC lawng nih a ngeih i cu zong cu ralkap sin ah an pe hna lo.

UEC nih vote cazin voi hnih a rak tar. A voi khatnak a tarmi ah palh sualmi a um ahcun remh khawh a si tiah mipi sin ah an thanh i, remhnak tampi zong an tuah.

Cucaah, a voi khatnak an tarmi vote cazin cu November 2020 thimnak ah hman a si lo. Palhmi ttha tein an remh dih hnu ah an tuah tthanmi a voi hnihnak vote cazin tu kha official in hman a si.

A voi hnihnak chuahmi official vote cazin cu ralkap nih UEC sin ah a hal i UEC nih a pek lo caah ralkap le USDP a dirkamhtu mibu nih UEC ralchanh in Yangon ah lamzawhnak le a dangdang cawlcanghnak pawl pehzul in an tuah.

Latest News

News in Burmese