Rakhine Party Win Le Zaw Caah Thai Cozah Nawl a Timh

| The Chin Journal | Hakha, Chin State

Rakhine Party ngan bik a simi Arakan National Party (ANP) nih thihdan pekmi Win le Zaw ca ah Thailand cozah sin ah nawlnak ca kuat ding in timhtuahnak a ngei, tiah theih a si.

ANP chimnak nawlngei Daw Aye Nuh Sein nih, “Zei tik ni ah nawlpatnak ca kan kuat lai ti cu theih a si rih lo. Ca kan tial cuahmah lio a si ko. Thai siangpahrang sin ah maw kan nawl lai, an Prime Minister sin ah dah kan nawl lai timi kan i ceih lio a si,” tiah a chim.

Thailand ram Koh Tao tikulh ah British nungak tlangval thah kong ah thihdan pekmi Win le Zaw hi Rakhine miphun an si.

“Thih dan pekmi Win le Zaw hi kanmah Rakhine miphun an si caah kannih ANP zong tuanvo kan ngei ko,” tiah Daw Aye Nuh Sein nih a chim chap.

Win le Zaw thihdan pek kong ah atulio Thailand ram ah a phanmi Myanmar ralbawizik Snr-Gen Min Aung Hlaing nih Thai ramhruaitu upa pawl sin ah nawlpiaknak zong a tuah.

Cun, Snr-Gen Min Aung Hlaing he Thailand ah a phan vemi Gen. Mya Tun Oo zong nih September 3 ah Win le Zaw cu pumpak in a vung vehvat hna.

Win le Zaw tiah a tawinak in auhmi Ko Win Zaw Tun le Ko Zaw Lin cu aluancia September 2014 ah Thailand ram, Koh Tao tikulh ah British nungak tlangval an thah hna timi sualphawtnak in December 2015 ah thihdan pek an rak si.

Nawlnak an tuah nain August 29 ah Thai Supreme Court nih thihdan thotho a pek hna caah Thai siangpahrang sin lawng ah nawlnak tuah khawh a si i, ni 60 chung ah nawlnak tuah ding in timhtuahnak an ngei.

-Development Media Group

Latest News