Rakhine: Khuami nih an Zamtakmi Innchung Thilri Eidin Pawl Kawl Ralkap an Phak Hnu ah an Tlau Dih

| The Chin Journal | Hakha, Chin State

Kahdohnak a chuah caah Rakhine khuami hna nih an zamtakmi an khua ah Kawl ralkap an luh hnu ah dawrthil le innchungkhar thilri pawl an tlau dih, tiah theih a si.

Rakhine ramkulh, Ratehdaung peng, Htiswai khuate pawng ah AA le Kawl ralkap kahdohnak a chuak i khuami tampi cu kiangkap khua pawl ah an zaam.

Htiswai khuate ah phone dawr a ongtu U Tan Naing nih, “Computer le phone pawl kan remh, cun kan zuar pah. Kan inn ah thilri pawl cu kan fim ta hna. Asinain, atu thawngpang kan theih ning ah cun Kawl ralkap pawl khuachung ah an rak lut i rawl an i chumh i an ei an ti. Kan zuarmi phone le computer pawl an tlau dih an kan ti,” tiah a chim.

U Phyo Phyo timi pa zong chiti, datsi, le eidin dawr a tuahmi a si i, Kawl ralkap an phak hnu ah a dawrthil tampi an tlau.

Dawr a tuah vemi U Maung Tan Tun le Daw Khin San Aye tibantuk pawl zong nih kan dawrthil an tlau dih hna tiah an chim.

Dawrthil pawl fir an ton hi October 7 zinglei ah a si. October 5 ah khan Htiswai khuate pawng ah a ummi Kawl ralkap tilawng pakhat AA nih an rak kah. Cucaah, Kawl ralkap pawl Htiswai khua ah an rak phak hi a si.

Kawl ralkap bu Northern Command in chimnak nawlngei a simi Col. Win Zaw Oo nih, “Mahka khua ah khan kan ralkap an lut lo. AA nih an fir hna i a si lai,” tiah Rakhine thanwgzamhnak Narinjara sin ah a chim.

Latest News