Rakhine ah Palik le Cozah Ralkap nih Tilawng aa Citmi Khuami 4 an Kah Hna

| The Chin Journal | Hakha, Chin State

Rakhine ram, Min-pyae peng ah tilawng cit in thilri a va cawmi khuami 4 palik le cozah ralkap nih an kah hna ruang ah khuami pakhat hliamhma a tuar.

March 25 zaanglei sml. 1:30 hrawng ah Min-pyae peng, Kala-ma-taung khuami 4 cu Min-pyae khua in thil cawknak in an rak kir lei ah palik le cozah ralkap aa bawmmi phu 1 nih an auh hna.

Authawng an theih lo ruang ah a langhlat in an kah hna. Meithal kahnak in Ko Maung Win Thein cu hliamhma a tuar.

“Min-pyae in kan rak kir lei ah an kan kah. Tilawng ka koih lio ah an kan khen. Zeiruang ah an kan kah timi ka hngal lo, firik tum in theihternak kan tuah tiah an chim. Tilawng ka mongh caah a thawng ka thei lo. Ralkap zong an i tel, palik zong an i tel. Minung 10 hrawng an si lai, kannih hi minung 4 kan si. Keimah lawnglawng hliamhma ka tuar, an kan auh caah kan va kal. Kan in kahmi hna a si lo, a cunglei kan kahmi a si tiah an chim” tiah hliamhma a tuarmi Ko Maung Win Thein nih a chim.

Meithal kahnak in Ko Maung Win Thein cu a keeng, a phei le a kee ah hliamhma hmun 5 a tuar. A dang tu cu hliamhma an tuar hna lo. An kah hna hnu ah chekhlainak an tuah hna. Cun, an thlah than hna.

Hi kong he pehtlai in Min-pyae peng palik sakhanhmu duh-ye-hmu Mya Zaw nih “Zeihmanh kan hngal lo, kan umnak he aa hlat, kan sin ah zeibantuk thawngpang hmanh a phan rih lo” tiah a chim.

-DVB

Latest News