Rakhine ah Inn 16 a Kaang, Minung 100 Dengmang Umnak Ngei Loin Har an Tong

| The Chin Journal | Hakha, Chin State

Rakhine ram, Mrauk-u khua ah inn 16 a kaang, minung 100 dengmang umnak ngei loin har an tong tiah Feb. 17 ah Rakhine thawngzamh Narinjara nih a langhter.

Mrauk-u khua U Hla Htun Phyo fanu Daw Khine Khine Win (48) a innchung meici in kangh hram aa thok tiah Rakhine ramkulh meithat zung nih thawng an thanh.

Umnak ngei loin har a tongmi hna cu phungki sianginn tual ah an dorter chung hna tiah Rakhine ramkulh hluttaw palai U Htun Thar Sein nih a chim.

“Meikangh ruang ah har a tongmi minung 98 an si. Eidin le hrukaih pawl khuami nih an bawmh hna. District lei in chanphio tlap 140 hlut ding in timhlamhnak an ngei. Cheukhat chungkhar hna cu an thilri zeihmanh lak manh loin an i hrukmi thilpuan lawng in a zaammi zong an um” tiah U Htun Thar Sein nih a chim.

Meikangh ruang ah tihloh le hliamhma tuar an um hraw lo tiah a chim.

Latest News