Pyidawtha Nu 8 nih Hakha College Quarantine Pawl Ca ah Eidin Tirawl Phunphun an Hlut Hna

| The Chin Journal | Hakha, Chin State

Hakha College ah a ummi Quarantine minung 50 dengmang ca ah Pyidawtha sang khuasa nu pariat nih nihin zanlei ah eidin tirawl phunphun an vung hlut hna, tiah thawng kan theih.

An hlutmi thilri chung ah ei awk le dinti, cun ngakchia nih an hmanmi Diaper le nitin a herhmi Tissue tibantuk tiang in aa tel.

Quarantine pawl ca ah eidin le thilri a hlutu nutung no pakhat nih, “Quarantine pawl lak ah ngakchia tete zong an i tel tik ah kan zaang an faak. Kan hlutmi hi a tlawmte a si ko nain Quarantine pawl hi leng an chuah khawh lo tik ah an ca ah zeital a tthahnem hngamaw tiin kan hlutmi a si,” tiah a chim.

Quarantine pawl an chiah hnanak Hakha Na Ta La sianginn sayagyi U Tin Myint Tun nih Quarantine pawl eidinnak ca ah nikhat ah minung pakhat ah Kyat 3,000 in tuakpiak an si, tiah The Chin Journal he biaruahnak ah a chim.

Quarantine pawl hi eidin kong ah nikhat 3,000 ca in tuakpiak a si ko nain micheu tihal le rawlttaam in a ummi an um ve tik ah Pyidawtha sang i lungthin dawh nu pariat nih atu bantuk in hlutnak zong an tuah hi a si.

Quarantine ca ah mipi lei in pumpak in eidin tirawl hlut timi hi The Chin Journal nih kan theih khawh tawk ah Hakha khua ah cun atutan hi a voi khatnak a si.

Latest News

News in Burmese