Pu Tler Ling Ruak Ralkap nih Kalay ah an Khangh

| The Chin Journal | Hakha, Chin State

Hakha SAC palik nih an tlaih i, a nunnak a liammi Pu Tler Ling (kum 56) ruak cu ralkap nih Kalay ah an khangh, tiah thawng kan theih.

Nihin zinglei ah Pu Tler Ling ruak lak ding in Hakha pastorte Rungtlang ah an vung kal i ralkap nih, “COVID-19 zawtnak a ngeih caah Kalaymyo ah a ruak kan khangh,” tiah an leh hna i ruak hlam ding in a kalmi pastorte cu an lawng in an rak kir.

Rungtlang ralkap nih COVID-19 zawtnak a ngei an ti nain May 12 chuak SAC thawngzamhnak Myanmar Alin nih cun “Pu Tler Ling hi Lung zawtnak a ngeih ruang ah a nunnak a liam” tiah an ttial.

May 9 ah Hakha, Nawi ah minung 5 an tlaih hna i, Pu Tler Ling hi Ngauthutlang ah a hawile pahnih he tlaih a tongmi a si.

Pu Tler Ling cu Hniarlawn khuami a si i Hakha khua, Cherry lamsang, Mission Church biakinn pawng ah a ummi a si.

Latest News

News in Burmese