, , /

Pu Aung Lian: 2020 Thimnak ah CNLD nih Chin Ramkulh ah Teinak Hmuh a Herhnak Aruang

The Chin Journal | Hakha | Chin State
Chin ramkulh hluttaw palai U Aung Lian (CNLD)

Tukum November 8 ah tuah dingmi Myanmar rampi thimnak ah Chin ramkulh chung ah CNLD nih zei ruang ah dah teinak hmuh a herh timi kong he pehtlai in Chin ramkulh hluttaw palai U Aung Lian nih a tanglei bang in a chim.

“Chin State ah CNLD nih teinak kan hmuh ahcun Cozah sernak nawl kan ngei la. Chin State Chief Minister tuantu ding cu mipi nih thimmi palai a si hrim a herh. Phunghram ah ralkap cozah palai hna cu mipi nih thimmi palai an si hna lo, tiin fiang tein a um caah Chief Minister an si kho lo.”

“Cucaah, Chin State ah CNLD nih 2020 thimnak ah teinak kan hmuh i cozah kan ser khawh ahcun kanmah tein CM thimnak nawl kan ngei la. Cozah sernak nawl tiang teinak kan hmuh khawh lo hmanh ah Hluttaw ah kan thazaang a thawn a herh. Hluttaw ah Chin Party a thawn i State cozah tha tein control a tuah khawh lawnglawng ah Chin State thanchonnak caah rian tampi a tuan khawh la.”

“Tukum thimnak ah CNLD nih teinak kan hmuh hrim a herh ko tiah ka ruahnak a ruang bik cu Union of Burma rak dirhka hrimhrim ah Chin cu kan rak i tel cang. Chin cu Union of Burma rak dirhtu hmasa kan rak si nain atu lio kan ramkhel sining ah cun Chin kan i telnak hmunhma a um lo ti tluk a si cang. Chin miphun zei ruang ah dah hi bantuk in kan i tel lo timi aruang cu Chin Party hi a dang Party kut tang ah kan um i anmah tluk in Mee (Vote) kan hmuh lo caah a si.”

“21st Century Panglong Peace Conference zong ah Phunghram remh ding an ti tikah Chin kan i tel lo. Kan hmurka a um lo. Hi bantuk thil a sinak aruang cu thimnak ah teinak kan hmuh lo caah a si. NLD, USDP, le Ralkap nih anmah duhnak cio an rak chuahpi lai. Sihmanhsehlaw, Chin Party nih cun hi bantuk caan ah kan duhmi chuahpinak nawl kan ngei ti lo. Thimnak ah teinak kan hmuh lawnglawng ah kan duhmi kan chimphuan khawh lai. Cucaah, cozah sernak 1% siloah 2% a herh lio caan ah bawmhchanh kan duh caah CNLD hi mee kan pek awk a si.”

“Cozah a ser khomi Party hna he ttanttinak/i fonhnak nawl cu kan kut cung ah um hrim seh ti kan duh. Phunghram nih zeitluk in a kan tlaih hmanh ah kan ttanttimi Party he riantuan ti khomi kan si a herh. Kan ttan ttimi Party nih an duhnak lawng kalpi loin kanmah kan duhnak le kan halmi hna zong kalpi kho ding in kan duh.”

“Cu bantuk a si khawh nakhnga Party pakhat le pakhat karlak ah itheihthiamnak le thanrual tinak a herh. Cu ti thanrual tinak kan ngeih khawh nakhnga tutan thimnak ah Chin mipi nih CNLD hi mee (Vote) kan pek a herh ko, tiah ka zumh,” tiah U Aung Lian nih a chim.

© The Chin Journal thawngpang Website dang ah nan tleng hrimhrim lai lo.

HNUBIK THAWNGPANG


ELECTION


COVID-19