Prime Minister Rian in Ka Chuak Lai Tiah Theresa May Nih Mitthli Hal Buin a Chim

| The Chin Journal | Hakha, Chin State

Britain Prime Minister Theresa May nih ka rian in kaa din cang lai tiah nihin May 24 ah mitthli hal buin thawngthanhnak a tuah.

European Union (EU) in United Kingdom (UK) chuahpi ding in Theresa May nih a rak i zuam lengmang nain EU he hnatlaknak an ngeih khawh lo pin ah UK ramchung ah EU in chuah a duh lotu an hun karh chin thluahmah ve.

“A rauh hlan ah ka rian in ka chuak cang lai. Rian in ka chuahmi kong ah lungthian lonak ka ngei lo. Ka dawtmi ka ram ca ah tuan khawhnak caantha ka hmuh caah ka lawm,” tiah a mitthli a tlak lo nakhnga i sum buin Theresa May nih a chim.

Prime Minister rian a chawngtu ding cu amah party (Conservative Party) chung in June 7 ah thimnak an tuah lai. Theresa May zong June 7 ah rian in aa din ve lai.

Theresa May rian in aa dinh hmanh ah EU in UK chuahnak kong ah buaibainak le harnak a ngan chin lai tiah an ruahdamh.

Aruang cu amah a changtu ding nih hin EU in UK chuah ding in faak khun in a kalpi lai tiah an zumh caah a si.

Atulio ah Theresa May i Prime Minister rian a chawng khotu bik ding tiah an zumhmi cu Boris Johnson hi a si.

-Reuters

Latest News