President Trump Nih Iran Dantat Chap Ding in Timhtuahnak Ngei

| The Chin Journal | Hakha, Chin State

Iran cung ah a thar in dantatnak khinh chap ding in US President Donald Trump nih September 18 ah a chim.

Saudi Arabia ram nitlak-thlanglei ah a ummi vawleicung a ngan bikmi zinan khor cawhnak sehzung pahnih cu Iran nih a bawmhmi Houthi ralhrang nih September 14 ah drone vanlawng pahnih in an rak kah.

Cu kong he pehtlai cun, “Hi zinan zehzung kahdohnak ah Iran zong tuanvo ngeitu ah aa tel,” tiah US nih sual a phawt i atu bantuk in dantatnak tuah chap ding in timhtuahnak a ngeih hi a si.

Obama chan ah Iran le US karlak rak tuahmi Nuclear ralhriam serchuah khenkhamnak hnatlaknak cu President Trump a kai hnu in US nih a hrawh i, cu caan thawk cun Iran le US karlak ah entainak linhsat hram a rak i thawk than. US nih sipuazi dantatnak zong Iran cung ah a tuah than.

Atutan Saudi Arabia zinan khor kahdoh kong ah President Trump nih, “Iran cung ah dantatnak chap ding in US Ngunkhua zung secretary ka chimh cang,” tiah September 18 ah a Twitter cahmai ah a tial.

Saudi zinan khor kahdoh a ton kong he pehtlai in US nih Iran sual a phawt bang in Iran cozah nih an ram ah a ummi Switzerland Embassy hmang in US sin ah ca a kuat ve.

Cu cakuat ah cun “Saudi zinan khor kahdoh a ton kong ah Iran pehtlaihnak kan ngei lo. Hi kong ah US nih Iran cung ah pakhatkhat a tuah a si ahcun lehrulnak kan tuah colh ve lai,” tiah Iran nih tlerhkhawnnak an tial chih.

-Reuters

Latest News