Porter Phorh Hi Ralzam Caah Chiahmi a Lo Cang: Chin Ralzam

| The Chin Journal | Hakha, Chin State

Paletwa peng, Miza khuahriang ah a ummi ralzam hna nih ralkap porter thla 2 leng an phor cang i porter phorh cu ralzam ca hrimhrim ah tuahmi a lo cang, tiah ralzam pawl nih an chim.

Ralzam camp ah a ummi kan Laimi (Bawm) ralzam Pa Mawi nih, “Porter phorh hi ralzam pawl kanmah ca hrim ah an chiahmi a lo cang. May 24 zong ah phorh than ding in a kan fial,” tiah The Chin Journal ah a chim.

Miza khuahriang ralzam camp ah a ummi Laimi pawl hi Bangladesh-Myanmar ramri i Pyidaung khuate ah a rak ummi an si.

Hlanlio an pupa chan ah Thantlang peng ah an rak um i Paletwah peng ah a rak pemmi an si hna.

Ralzam camp ah a ummi Laimi pawl cu zarh khat ah voi 2 in voi 3 hrawng ralkap nih porter an phorhter hna i atu in cun thla 3 chung a si cang.

Ralzam pawl an umnak Miza khuahriang in meng 7 hrawng a hlatnak Kha-Maung-Wa ralkap hmunkhuarnak ah facang le pe pawl an phorhter hna hi a si.

Voi khat porter phorh ah minung 10 in 25 karlak hi kal zungzal a si. Pa an um lo cun nu zong phorhter an si tawn.

Asinain, Miza khua uktu U Hoih Law nih cun, “Porter hramhram in an phorhter hna a si lo; ralzam pawl nih ralkap pawl an bawmh hna bia tu a si,” tiah May 14 ah khan phone in The Chin Journal ah a rak chim.

Latest News