Phungki Wirathu Dantat Khawh Ding in NLD Cozah aa Zuam Cuahmah

| The Chin Journal | Hakha, Chin State

Naite ah phungki U Wirathu nih Taningtharyi ramthen, Meik khua ah a rak chimmi bia kong he pehtlai in dantatnak tuah khawh ding in acozah lei nih an i zuam cuahmah, tiah theih a si.

A chimmi bia kong he pehtlai in Myanmar ram biaknak le nunphung vuanci zung nih hlathlainak le zohfelnak an tuah cuahmahmi upadi he aa kalhmi a um ahcun dantat ding in khuakhaan a si, tiah vuanci U Myint Oo nih a chim.

May 5 ah Meik khua ah 2008 phunghrampi pohma 59 (f) remh lo ding in duhnak langhternak an rak tuah i cu hmun ah cun Daw Aung San Suh Kyi ralkah in U Wirathu nih bia dawh lo a chimmi a rak um.

Wirathu nih Suh Kyi cu, “Make-up te i thuh, Fashion tling ngaiin i thuamh, Kedil sang te hun i danh i, pirh meohmeuh tein lamkal, mah lak ah ramdangmi a hmuh hna a si ahcun a tawk thui ai timh hoi, hi tluk aa lekmi nih dakaw President si cu a hei duh ve. Kan ram cu kan lotlau hrimhrim ko lai,” tiah dawhcah lo taktak in a rak soisel.

U Wirathu nih Suh Kyi kong a chimmi bia dawhcah lo kong he pehtlai in vuanci Thura U Aung Ko nih tazacuainak kan tuah lai, tiah May 6 ah 7Day News Journal sin ah a rak chim ve cang.

Phungki U Wirathu cu Mandalay khua ah a ummi “Ma Soe Ying” phungki sianginn i sayadaw a si i, 2012 Rohingya thahnawnnak kong ah TIME Magazine nih Buddhist Terrorist tiah a rak auhmi zong a si.

Myanmar ramchung ah miphun le biaknak kong ah hninsaihnak a chuahpi zungzaltu Kawl Buddhist Phuntanh Bu (Ma Ba Ta) i an hruaitu zong a si.

Latest News