Phungki Wirathu aa Langh Lecangka in Kawl Miphun le Biaknak Cawlcanghnak a Chuak

| The Chin Journal | Hakha, Chin State

Myanmar rampi thimnak zarh khat lawng aa duh ah phungki Wirathu cu aa dupnak hmun in a rak chuak i, Yangon ramtthen nitlaklei district palik sakhaan ah amah tein a vung i ap.

November 2 ah palik sakhaan ah aa ap hi a si i, cu lio ah cun “(Kawl) miphun le biaknak a dirkamhtu party vote pe hna uh,” tiah Media tampi hmaika ah a chim.

November 3 zinglei ah Mandalay khua ah “(Kawl) miphun le biaknak a dirkamhtu party vote pe hna uh,” timi catlap pawl an hun zamh colh i Kawl miphun le biaknak dirkamh in cawlcanghnak a chuak colh.

Mandalay ah Kawl miphun le biaknak cawlcanghnak kong hrihawh in ca a zamhtu minung pahnih zong nihin zinglei sml. 10:00 hrawng ah palik nih an tlaih hna.

An tlaihmi hna minung pahnih chung ah pakhat cu sihni a si. Cun, ca a zamhtu chungtel pawl lak ah hin U Wirathu hruainak in an rak dirhmi Kawl Miphun le Biaknak Kilvengtu Bu (Ma Ba Ta) chungtel pawl an i tel.

Nihin Zinglei Mandalay ah an zampmi catlap

Kawl Miphun le Biaknak kilvengtu bu (Ma Ba Ta) cu NLD cozah a kai hnu May 2017 ah acozah nih a hrawh i, atu ahcun phungninglo bu an si cang.

U Wiranthu cu Myanmar ramchung ah miphun le biaknak dangdang karlak ah buaibainak chuahpi ding in phung a chim ti ruang ah March 10, 2017 ah phungchimnak nawl phih a rak si.

November 2 ah U Wirathu cu Yangon Nitlaklei District palik zung ah amah tein aa ap

Phungchimnak nawl an phihmi a caan a dih hnu ah ningcang loin phungchimnak a tuah tthan i, “Aung San Suh Kyi cu Hlawhlang” tiah a volhpamh pin ah “Ralkap MP pawl hi pathian kan upat i kan biak bantuk in kan upat le kan biak hna hmanh a herh,” tiah Meik khua ah a rak chim chap.

Cucaah, U Wirathu cu Myanmar ramhruaitu hna limhaang chiatchuahnak bia a chim tiin pohma No. 124 (a) in tazacuai a rak si.

Tlaih ding in nawlchuah a rak si hnu ah a zaam i, kum khat fai a rauh hnu nizan ah palik sakhaan ah aa ap nain hrihawhnak bia a chim ruang ah Mandalay ah Kawl miphun le biaknak cawlcanghnak aa vun i thawk colh hi a si.

Phungki Wirathu cu November 17 ah biaceih zung ah chuahpi ding in timhtuah a si i, nihin zinglei ah Insein thonginn ah an kuat cang, tiah theih a si.

Latest News

News in Burmese