Tlaih ding in biaceih zung nih nawl a chuah (Arrest Warrant) hnu ah a umnak theih loin a rak zaammi phungki U Warathu cu nihin (Nov. 2) ah Yangon ramtthen, nitlaklei district palik sakhaan ah amah tein a vung i ap, tiah theih a si.
U Wirathu cu Myanmar ramhruaitu hna limhaang chiatchuahnak bia a chim tiin pohma No. 124 (a) in tazacuai a rak si nain an tlaih manh hlan ah a rak zaam.
Myanmar ramchung ah miphun le biaknak dangdang karlak ah buaibainak chuahpi ding in phung a chim ti ruang ah March 10, 2017 ah U Warathu cu Myanmar ramchung ah phungchimnak nawl phih a rak si.
Phungchimnak nawl an phihmi a caan a dih hnu ah ningcang loin phungchimnak a tuah tthan i, “Aung San Suh Kyi cu Hlawhlang” tiah a volhpamh pin ah “Ralkap MP pawl hi pathian kan upat i kan biak bantuk in kan upat le kan biak hna hmanh a herh,” tiah Meik khua ah a rak chim chap.
Tlaih ding in nawl chauh chap a si hnu ah khoika ah dah a zaam timi theih a rak si lo. Asinain, nihin ah amah tein palik kut ah a vung i ap hi a si.
[Cherhchan: 7Day News Journal]
