Phunghrampi Pohma Pahnih Lawng Remh Ding in an Lungtling

| The Chin Journal | Hakha, Chin State

Nihin March 10 ah tuahmi Pyidaungsu Hluttaw ah 2008 phunghrampi pohma remh ding in an chuahpimi 14 lak ah pahnih lawng remh ding in an lungtling.

Vote laknak ah Pyidaungsu Hluttaw a kai khomi Hluttaw palai 643 an si i, remh ding in an chuahpimi a tam u cu lungtlin a si lo.

Remh ding in lungtlinmi pohma pahnih cu Pohma 32 (a) le 32 (b) lawng hi an si. Pohma 32 (a) ah “Nu le ngakchia pawl, ngakttah pawl, a nunak a liammi ralkap fale, kum upa tar pawl le pumtlinglo pawl kha rampi nih a zohkhenh hna lai,” tiah aa ttial i cucu remh ding in lungtlin a si.

Pohma 32 (b) ah “Pumtlinglo in a ummi ralkap pawl hmailei an nunlam ttha tein an hman khawh nakhnga pawcawmnak lei fimthiamnak cawng ding in rampi nih a tawlrelpiak hna lai,” tiah aa ttial ve i cu zong cu remh ding in hnatlak a si.

A cunglei pohma pahnih lawng hi remh ding in hnatlak a si i, biapi khun in an chuahpimi (Abikin uknak le ramkhel ah Ralkap an i telnak) pohma pawl hrawh/remh ding in lungtlin a si lo.

Atutan hi 2008 phunghrampi chung i pohma pawl remh ding in NLD cozah nih a voi 2nk a hun nor a si i, i ruahchan ning in tlam a tling lo.

Latest News

News in Burmese