Pe 30′ Hrawng a Sangmi Lairal Lungphun Ting 200 MMK in an Phun Lai

| The Chin Journal | Hakha, Chin State

Hakha khua, Lai Tidil (Ralkap Tidil tiah auh tawnmi) pawng ah pe 30′ hrawng a sangmi Minthang Lairal Lungphun cu tangka ting 200 MMK hmang in phun kan timh, tiah Lai Chiatthat Bu (LCB) Chairman Pu Tial Ling nih a chim.

“Lairal lungphun hi atukum December ah tuah ding in timhtuahnak kan ngei. Kanmah LCB zong in kan vung tlung ve lai. December in kan thawk lai i, hmaikum Chin Miphun Ni ah onnak tuah khawh ding in kan i ruahchan. Hi lungphun hi a tlawm bik pe 30 hrawng sang in tuah ding in kan timhtuah i, kanmah LCB nih ting 50 MMK, Laitlang lei nulepa hna nih ting 50 MMK le ramleng Laimi hna nih ting 100 MMK thawh ding in timhtuah a si,” tiah October 26 ah The Chin Journal ah a chim.

“Hi lungphun cung ah hin Lairal lio i thong a rak tlami kanmah theih tawk ah minung 82 an min, cun, a nunnak a rak liammi minung 6 cazin kan ngei. Cu pawl cu tar ding kan ti. Zeitindah kan tar lai ti cu kan i ceih tthan lai,” tiah Pu Tial Ling nih a chim chap.

Hi hmanthlak hi The Chin Hills timi Carey and Tuck nih 1896 ah an rak chuahmi cauk chung in lakmi a si. Aiawhtu hmanthlak men ah tarmi a si (Representative Image)

LCB Secretary Pu Peng Hu nih, “Aluancia kum 100 kan tuanbia kan theih khawh ahcun hmailei kum 100 kan sining hmuh khawh he aa lo tiah Dr. Lian Hmung Sakhong zong nih a rak chim i ka uar ngai. Mirang pawl nih kuli rak phorhter ruang ah kan pupa hna nih an rak el i dohnak tiang a chuak. Anmah Mirang zong nih Minthang Lairal ti bak i an rak auh vemi hiti sawhsawh i Kawl cozah zong nih theihpi lo, kan tefa hna zong nih theihpi loin a um lai ding cu a si kho hrim lo. Khi Tidil hmanh khi Kawl cozah ralkap cawhmi tidil ah kan ruah. A ngai ah cun Mirang nih thong an rak thlakmi kan pupa hna nih an thlanti le an thisen he an rak cawhmi a si. Hi kong hi tthangthar mino hna, Kawlram uktu bawi vialte hna le vawleicung hmun kip in a rak tlungmi hna zong nih Mirang kan rak dohnak hi thei kho hna seh tiin saduhthahnak nganpi he tuah kan timhmi a si,” tiah a chim.

Minthang Lairal lungphun ding kong he pehtlai in August 2019 ah Hakha khua, Sipin zung ah Chin ramkulh Hluttaw Speaker Pu Zo Bawi, LCB upa hna, khuanu khuapa hna le Sipin upa hna tonnak an rak ngei i committee an rak ser hnu ah atu bantuk in lungphun rian ttuanchuah khawh a si nakhnga an hun tawlrel cuahmah hi a si.

Latest News