Pathian Sin Thla an Cam Hnu ah “Amen” Timi Tilawng a Rak Phan

| The Chin Journal | Hakha, Chin State

Rili laifang ah suimilam pakhat le cheu chung bawmtu ngei loin a ummi US nungak no le tlangval no cu Pathian sin ah bawmhnak hal in thla an cam hnu ah “Amen” tiah min pekmi tilawng an pawng ah a rak phan i nunhim in khamh an si, tiah ABC News thawngzamhnak nih a tial.

Florida, Jacksonvillte ah a ummi Christ Church Academy ah a kai liomi nungak no Heather Brown le tlangval no Tyler Smith cu an hawile he rili ah nuamhnak tuah ding in tilawng in an kal hna.

Tikulh pakhat he aa hlat tuk lonak rili cung an phak ah khin ti i lio ding in an hawile he cun ti chung ah an zuang hna.

“Khika tikulh tiang kan i lio lai” tiah Brown le Smith nih cun an ti i an vung i lio thluahmah. Lamhlat tuk an phak cang caah an hawile ahohmanh nih an zul ti hna lo.

Sihmanhsehlaw, rili tihrah a thawn caah phak an timhnak tikulh lei panh kho loin rili laifang tu ah a choih uahmah hna.

An hawile zong nih an hmu kho ti hna lo. “Lamhlat tuk an phak cang caah kan hmu kho ti hna lo i bawmhnak hal ding in kan kir,” tiah tilawng cung a ummi an hawile nih nehhnu ah an chim than.

Brown le Smith cu lungrethei vansang in rili cung ah suimilam pakhat le cheu chung an vuan cang. Ti i lio ding zong in an thazaang a ek cang. Cu lawng si loin an i lio zong ah tihrah a thawn caah tlaang an phan kho ti lo.

Tlangval no Smith nih, “Thadi zaangba le lungrethei in rili cung ah cun ka thal in ka vuan. Pathian hi thil hi kan cung ah tlunter hrim hlah. Ka chungkhar pawl hmuh ta ka duh rih hna. Bawmhtu kan thlahpiak ko sawh tiin thla ka cam,” tiah a chim.

Rili cung ah Brown le Smith a khamhtu “Amen” tiah minkhenhmi tilawng

Cuti Smith nih Pathian hlam in thla a cam dih cun “Amen” tiah minkhenhmi tilawng pakhat cu ruah lo piin an pawng ah a run phan.

“Amen” timi tilawng a mongtu pa hi Captain Eric Wagner a si. Wagner nih, “Minung pahnih rili ah an vuanhmi  a lang in kan hmuh hna. Kan kal hnawh hna i kan zoh hna tikah thinphang thlalau tuk in an rak um. Life Jacket kan hei hlonh hnawh hna i cuticun kan char khawh hna,” tiah ABC News sin ah a chim.

Eric nih cun, “Atu bantuk in ruah lo piin kan hmuhmi hna hi keinih cun vanthat ah ka ruat lo. Pathian kutneh a si ko,” tiah a chim chap.

Latest News