Pastor Pa nih Pumh Lio ah a Nupi Nam in a Sawh, aa That Ve

| The Chin Journal | Hakha, Chin State

Kenya ram, Mombasa khua ah Assistant Pastor a ttuanmi Elijah Misiko (kum 55) nih Zarhpi zing pumh lio ah a nupi cu nam in a sawh i amah zong cuka hmun ah cun aa that ve, tiah CNN nih January 6 ah a ttial.

Hi thil sining hi Mombasa khua i Ground for God’s Gospel Church timi Khrihfabu ah a cangmi a si.

Naam in sawh a tongmi nu hi Ann Mughoi tiah auhm a si i, Ground for God’s Gospel Church ah Senior Pastor a ttuanmi a si.

Pastor Elijah Misiko le Pastor Ann Mughoi hi nuva an si nain Khrihfabu hruaitu luzik thudan kong le Khrihfabu dirhtu sinak kong ah caan saupi an rak buai cang.

Aluancia 2017 ah khan cu kong ah cun Pastor Ann Mughoi nih a vapa Pastor Elijah Misiko hi a rak report i palik nih an rak tlaih bal. Cu lio ah cun thah a ka timh, tiah a nupi nih a rak report. Cu caan thawk cun an rak i tthen.

Zarhpi zing pumh thlacam lio ah pulpit cung ah a tthumi Pastor Ann Mughoi cu Pastor Elijah Misiko nih a kal hnawh i, biathli chimh ding bang in aa umter hnu ah nam in voi 2 a sawh.

Cu dih cun, amah zong nam in a hngawng ah aa aat ve i a hmun ah a nunnak a liam. Pastor Ann Mughoi cu sizung ah an kalpi nain namsawh hliamhma in a nunnak a liam ve, tiah theih a si.

-CNN

Latest News

News in Burmese