/

Pastor Chungkhar Hmuahchih in Meithal in Kah an Tong nain Ahohmanh an Thi Lo

The Chin Journal | Hakha | Chin State

Nigeria ram i Khrihfa Mission sianginn pakhat ah pastor chungkhar cu minung pathum nih hmuahchih in meithal in an kah hna nain a nunnak a liammi ahohmanh an um lo, tiah theih a si.

Aluancia May 5 zanlei ah khan Nigeria ram, Plateau ramkulh chung ah a ummi Gana Ropp khua ah AK 47 meithal aa tlaihmi misual pathum nih Khrihfa Mission sianginn Messiah College Mission cu an luh hnawh.

Misual pawl an rak luh lio ah hin sianginn lutlai Pastor Bano Famonure le a nupi le an fapale pahnih hi zanlei thlacamnak an ngeih lio a si.

Misual pathum nih tangka an hal hna i, Pastor Bano Famonure nih tangka kan i chiahmi a um lo tiah a ti tikah meithal in an pali ning in an kah hna.

Pastor Bano Famonure cu a lu le a kee ah an kah. Cun, a nupi cu a keng ah an kah i an fapale pahnih zong a kee ah an khen veve hna.

Meithal in an kah dih hna lecangka in misual pathum cu an zaam.

Sizung ah an kalpi tik hna ah Pastor pa a lu ah an kahmi kuanfang nih a luruh a rak pemh lo.

Cun, a nupi a keng an kahmi kuanfang zong nih a pumchung i abiapimi pawl a kheng lo i, nunhim in a um. An fale pahnih zong an kee lawng ah an khen hna i nunhim in an um ve.

Pastor Bano Famonure nih, “Atu bantuk in thihnak in kan luat cu khuaruahar thil ngai a si ko. Ka lu ah an ka kahmi kuan nih ka luhruh a pemh lo pin ah ka kee an kahmi zong nih ka keeruh a kheng lo,” tiah a chim.

Pastor Bano Famonure te chungkhar hi Barnabas Fund nih a bawmhmi Agape Mission rian a ttuanmi zong an si i, atu an tonmi thil sining kong hi Barnabas Fund nih a langhtermi a si.

Barnabas Fund cu UK ah hram a bunhmi vawleicung Khrihfa bawmtu bu pakhat a si i, vawleicung hmun kip Pathian rianttuannak lei ah bawmhnak a petu a si.

THAWNG THAR

The Chin Journal Internship Program ah Thantlang, Hakha le Falam ah a ummi paoh i tel khawh a si. Hi Internship Program ah i tel na duh ahcun APPLICATION FORM hi phi ve.