Paletwa Ralzam Hna Cu Facang Tlawmte le Changreu an Chumh Ṭi i an Ei Cang

| The Chin Journal | Hakha, Chin State

Paletwa peng, Miza ralzam camp ah a ummi Laimi Bawm kan unau ralzam hna cu rawl ei awk a har chin thluahmah tik ah facang tlawmpalte le changreu an chumh tti i cuticun zingzan rawl an ei cang, tiah theih a si.

Miza ralzam camp ah a ummi patung no pakhat nih, “Facang cawk awk zong a um ti lo. Cawk awk a um hmanh ah kannih cu rianttuan awk zong a um lo tikah tangka kan ngei lo. Atu cu facang kan ngeihchunh tete pakhat le pakhat kan i phaw hna i ahlan i NGO nih a rak kan pekmi changreu he kan chumh tti hnu ah cuticun kan ei hna,” tiah March 10 zinglei ah The Chin Journal ah a chim.

Bawm ralzam chung in Thantlang peng Tikir ah a kalmi minung 100 fai an um nain Miza ralzam Camp ah innchungkhar 18, kum 5 ngakchia 20 telh in minung 80 hrawng an taang rih.

Ei awk facang an ngeih ti lo tik ah nihin zing ah Tharu Aing timi khua i Kawl ralkap hmunkhuarnak ah ralzam 12 an vung kal i facang an hal hna.

“Nihin zinglei sml. 11:00 ah khan Kawl ralkap sin ah minung 12 kan kal i facang kan hal hna. Asinain, anmah ralkap zong facang an chambau ve caah a kan pe lo. India lei ah nanmah tein facang phiarnak lam nan theih ah cun nawl onhnak ca kan in ttialpiak hna lai a kan ti i, thaizing ah rak ra tthan u tiah bia a kan cah,” tiah a chim chap.

Miza khua uktu U Hoih Law nih, “Atulio cu ralzam pawl lawng si loin kan khua zapi in kan har tuk hna. Innchungkhar cheukhat nih an rak i fimmi facang kha kan i phaw hna i cuticun kan nung hna. Paletwa lei le India lei zong in facang a rak lut ti lo. Facang tun khat ah 100,000 a phan cang lai. Asinain, cawk awk a um lo,” tiah a chim.

Kawl ralkap le AA hriamtlai an i kah ruang ah Paletwa peng nih chawlehrawlnak ah a hman bikmi Paletwa-Kyaukdaw motor lam le ti lam khar a si pin ah Matupi lei lampi zong ah AA hriamtlai an um caah khawzeilei hmanh in tirawl phorhnak lam a um lo.

Latest News

News in Burmese