Paletwa Ralzam Caah Facang a Phormi Motor (10) AA nih Lampi ah an Kah

| The Chin Journal | Hakha, Chin State

Paletwa khuachung ah a ummi ralzam 4,000 dengmang ca ah facang a phormi motor (10) cu Paletwa he meng (4) a hlatnak hmun ah AA nih an kah caah Paletwa ah lut kho loin an kir tthan, tiah thawng kan theih.

April 16 chun ah khan Paletwa ralzam pawl ca ah tiin facang tun (830) cu motor 11 in phorh ding in an i thawh. Motor pakhat a rawh caah motor (10) tu in an kal.

“April 16 ah khan facang tun (830) cu motor (10) in Paletwa lei ah an kalpi. Paletwa le Sami he meng 40 hrawng lawng aa hlat nain AA nih lampi ah an kah hna caah Paletwa ah an lan kho lo. Paletwa he meng 4 a hlatnak ah AA nih an kah hna i motor pawl cu an kir tthan. Mahti ning hin cun Sami ah an rak kir tthan a hau ko lai,” tiah Paletwa ralzam bawmtu committee upa saya Thang nih The Chin Journal ah a chim.

Chin ramkulh sipin vuanci U Soe Htet nih, “Biaknak bu le NGO pawl nih an zulh hna i mibawmtu bu kan si timi Vinyl le thantar araangmi zong motor ah an tar ko hna. Asinain, Paletwa hlei an phak lai ah AA ralhrang nih an rak kah hna. Lohnu khua thlanglei tlang cung in an kah hna hi a si. Paletwa ca ah cun lungrethei ngai a si ko. Ralzam pawl cawmkennak ca ah tiin kan timhtuahmi cu tlamtlin loin a taap ko. Hi bantuk bawmhnak a phormi hi cu minung pakhat le pakhat i zawnruahnak he AA nih hnahnawhnak an pek awk a si lo,” tiah a chim.

Paletwa khuachung ah ralzam 3,700 hrawng an um i Paletwa ah facang a luh ti lo caah eidin tirawl lei ah harsa ngaiin an um hna.

Saya Thang nih, “Atu sining hin cun ni zeidah dah an ei awk nih a nguh hna lai timi chim awk a ttha lo. Thaizing zong ah rawl ei awk ngei lo an si kho,” tiah a chim.

Chinram chung AA le Kawl ralkap an i kah ruang ah Sami ah ralzam 3,000 hrawng an phan i, Sami lei ah a panh kho lomi ralzam 3,700 hrawng Paletwa khuachung ah harsa ngaiin khua an sa ve.

Atulio COVID-19 zawtnak a tlun lio a si bang in UN General Secretary zong nih vawleicung hriamtlai kahdohnak pawl ngol dih ding in thawng a thanh nain AA le Kawl ralkap kahdohnak belte pehzul in a fak chinchin.

CNF/A zong nih COVID-19 dohnak lei tu ah lungrual in thazaang chuah tti ding in cathanh an chuah nain Chinram chung i AA le Kawl ralkap kahdohnak cu ngol um loin zual lei tu a panh chinchin.

Nizan nai ah khan CHRO telh in vawleicung zatlangbu 130 leng nih kahdohnak ngol ding in cathanh an chuah ve.

Latest News

News in Burmese