Paletwa Peng ah cun NLD Palai Panga Ning in Teinak Kan Hmu Ko Lai-MP U Myo Hteik

| The Chin Journal | Hakha, Chin State

Aralaimi November thimnak ah Chin ramkulh Paletwa peng ah NLD in aa zuam dingmi palai panga nih teinak kan hmuh dih ko lai, tiah atulio Amyotha Hluttaw ah MP a simi U Myo Hteik nih a chim.

July thla chung ah khan Sami khua ah The Chin Journal nih MP U Myo Hteik cu pumpak ton biaruahnak kan ngeih i cu lio ah cun a cunglei bang in a chim hi a si.

“Paletwa peng ah cun 2015 lio bang in Landslide in kan tei lo hmanh ah NLD palai panga ning in teinak kan hmuh lai tiah ka zumh ko. Aruang cu NLD party le NLD palai hna nih mipi ca ah zeidah kan ttuan ti cu anmah mipi nih an theih dihmi a si ko,” tiah MP U Myo Hteik nih a chim.

“Ramkhel lei thlennak tuah tik ah hin mizapi nih zakhat ah zakhat in dirkamh timi cu a har ngaimi a si. Sihmanhsehlaw, Paletwa peng mi tam u nih kan rianttuanmi cung ah siseh, NLD party cung ah siseh, atulio cozah cung zong ah siseh, zumhnak an ngei ti hi ka zumh ca ah 2020 thimnak zong ah teinak kan hmu lai tiin ka zumh ngam hi a si,” tiah a langhter chap.

Paletwa peng cu Chin ramkulh chung ah a kau bikmi le milu an tam biknak a si.

November thimnak ah Paletwa peng ah NLD aiawh in U Myo Hteik (Ramkulh Hlutaw-2), U Soe Htet (Ramkulh Hluttaw-1), U Hwai Tan (Amyotha Hluttaw), U Aung Swe (Pyituh Hlttaw), U Pyi Min (Amyotha Hluttaw) tiin an i zuam hna lai.

Latest News

News in Burmese